Լավ է ուշ, քան երբեք

Կառավարությունն այսօրվա նիստում ընդունեց «Հայաստանի Հանրապետության քրեական օրենսգրքում փոփոխություններ և լրացումներ կատարելու մասին», «Հայաստանի Հանրապետության քրեական դատավարության օրենսգրքում լրացում կատարելու մասին» և «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ և լրացումներ կատարելու մասին» Հայաստանի Հանրապետության օրենքների նախագծերի մասին փաթեթը: Այս փաթեթը կառավարությունում երկար ու բուռն քննարկումների արժանացավ: Արդարադատության նախարար Արտակ Զեյնալյանն ասաց, որ փաթեթի ընդունմամբ նախատեսվում է խստացնել պատասխանատվությունը ընտրակաշառքի համար, և Վարչական իրավախախտումների մասին օրենսգրքից այն պետք է տեղափոխել Քրեական օրենսգիրք՝ նախատեսելով ոչ միայն  տուգանքի չափով պատիժ, այլ նաև ազատազրկում:

Սա իհարկե անչափ դրական քայլ է , հաշվի առնելով այն փաստը , որ ընտրակաշառքի հարցը Հայաստանի համար ամենացավոտ խնդիրներից մեկն է: Տարիներ շարունակ ձևավորված քաղաքական ամենաթողության ՝ «տոկոսներ խփելու» գործում իր մեծ ավանդը ունի նաև ընտրակաշառքը, այդ չարաբաստիկ 5000 դրամները, շատ դեպքերում նաև էլ ավելի մեծ գումարները, որոնք էականորեն ազդել են ընտրությունների արդյունքների վրա: Բնական է, եթե նոր իշխանությունները ցանկանում են երկրում նոր ընտրական մշակույթ ձևավորվել, ապա առաջին քայլը պետք է լիներ հենց ընտրակաշառքի քրեականացումը: Սակայն քննարկվող օրինագծի մեջ առկա են նաև բացեր, իսկ հաշվի առնելով մեր ազգի կրեատիվը՝ կասկած անգամ չկա, որ այդ բացերից օգտվողներ կլինի: Այսպես օրինակ՝ թույլատրվելու է կուսակցության տարբերանշանով , կամ թեկնածուի պատկերով քարոզչական նպատակներով հուշանվերներ տարածել: Միայն այս կետը բավական է, որպեսզի օրենքի ողջ  ազդեցության ուժը հավասարվի զրոյի: Հենց այս հանգամանքի վրա էլ արդարադատության նախարարի ուշադրությունը հրավիրեց վարչապետ Փաշինյանը, մինչդեռ տարակուսելին այն է, որ Զեյնալյանը լինելով ոլորտի մասնագետ ՝ նման «հում նախագիծ է ներկայացնում կառավարության դատին: Ակնհայտ է, որ եթե օրինագիծը այդ տեսքով բերվեր ԱԺ, ապա այնտեղ ներկայիս կաբինետի քաղաքական օպոնենտները քարը քարին չեն թողնի նախագծից, հետևաբար այն չի անցնի, ինչը կդիտարկվի ոչ իբրև Զեյնալյանի, այլ Փաշինյանի պարտություն: Այսօրվա դրվագը մեկ անգամ ևս ցույց տվեց կառավարությունում առկա այն իրավիճակը, երբ վարչապետը ստիպված է լինում ընթացքում ուղղել իր թիմակիցների սխալները…