Սուրիկ Խաչատրյանի որդին կարող է մեկնել զինվորական ծառայության

Սյունիքի նախկին մարզպետ Սուրիկ Խաչատրյանի որդի Տրդատ Խաչատրյանը կարող է մեկնել պարտադիր զինվորական ծառայության: Այս մասին ԼՈւՐԵՐ.com-ի հետ զրույցում ասաց Տրդատ Խաչատրյանի փաստաբան Արմեն Մարտիրոսյանը:

Նշենք, որ Սուրիկ Խաչատրյանի որդիների՝ Տրդատ և Տիգրան Խաչատրյանների՝ բանակից ազատման հիմքով Քննչական կոմիտեում քրեական գործ է հարուցվել՝ փաստաթղթերը կեղծելու կասկածանքով: Այսինքն՝ նրանք հիվանդ չեն եղել, բայց ազատվել են զինծառայությունից: Այնուհետև, Տրդատ Խաչատրյանը դիմել էր Պաշտպանության նախկին նախարար Դավիթ Տոնոյանին՝ խնդրելով իրեն զորակոչել բանակ:

Տրդատ Խաչատրյանի առողջական վիճակը պարզելու համար որոշում էր կայացվել ստացիոնար դատահոգեբուժական հանձնաժողովային փորձաքննություն նշանակելու մասին, դատարանը բավարարել էր այս միջնորդությունը և վերջինս փորձաքննություն էր անցնում:

«Դեռևս իմ պաշտպանության ժամանակ, Տրդատ Խաչատրյանը բժշկական հանձնաժողովում ստուգում անցավ: Ըստ զննության արդյունքների՝ նա ճանաչվեց ծառայության ենթակա: Հաջորդ օրը նա կարող էր զորակոչվել զինվորական ծառայության, սակայն չզորակոչվեց, քանի որ զորակոչի ժամկետն արդեն լրացել էր: Հավանաբար, հաջորդ զորակոչին կմեկնի զինվորական ծառայության»,-ասաց Մարտիրոսյանը: 

Փաստաբանի խոսքով՝ ըստ փորձաքննության եզրակացության պարզվել է, որ Տրդատ Խաչատրյանը թեև  առողջական խնդիրներ ունի, նրա մոտ առկա է նախկինում զինծառայության չմեկնելու պատճառ հանդիսացող հիվանդությունը, բայց՝ ավելի մեղմ արտահայտված, ինչը խոչընդոտ չի հանդիսանում զինվորական ծառայության համար: