Հայազգի երեխաները, որոնք Նիդերլանդներից Հայաստան պետք է արտաքսվեին, կրկին թաքնվել են

Հայազգի քույր և եղբայր, 12 և 13 տարեկան Լիլին և Հովիկը, ում սեպտեմբերի 9-ին Նիդերլանդներից պետք է արտաքսեին Հայաստան, կրկին թաքնվել են: Այս մասին հայտարարել է Նիդերլանդների կառավարության մամուլի խոսնակը, հայտնում է «Ազատություն» ռադիոկայանի Նիդերլանդների գրասենյակը: 

Արդարադատության նախարարության խոսնակ Մարտին Մոլենբիկը սեպտեմբերի 8-ին հաղորդել է, որ անչափահաս երեխաները, որոնք նույնականացվել են միայն որպես Լիլի և Հովիկ, լքել են խնամատար տունը, որտեղ նրանք մնացել էին գիշերն այն բանից հետո, երբ Ամստերդամի դատարանը մերժել էր նրանց վերջնական հայտը՝ կասեցնելու իրենց արտաքսումն ու թաքնվել: 

Երեխաները Նիդերլանդներ էին գնացել իրենց մոր՝ Արմինե Համբարձումյանի հետ 2008-ին Ռուսաստանից: Նրանք Նիդերլանդներից ապաստան են խնդրել, որի պատասխանը ստացել են 9 տարի անց միայն՝ 2017թ.-ին: Պատասխանը բացասական է եղել և նրանց Հայաստան արտաքսելու մասին որոշում է կայացվել: Արմինե Համբարձումյանն արտաքսվել է 2017-ին, սակայն երեխաները մնացել էին Նիդերլանդներում, քանի որ իշխանությունները նրանց գտնվելու վայրի մասին տեղեկություններ չեն ունեցել, իսկ մայրը թաքցրել է երեխաների գտնվելու վայրը: 2018թ. սեպտեմբերի 3-ին երեխաները դուրս են եկել թաքստոցից: Երեխաները երբեք Հայաստանում չեն եղել և չեն խոսում հայերեն: Նրանց դատապաշտպանը վիճարկել է, որ երեխաների մայրը ի վիճակի չէ նրանց մասին հոգ տանել պատշաճ կերպով:  

Ավելի վաղ՝ սեպտեմբերի 7-ին Նիդերլանդների երեխաների օմբուդսմեն Մարգարիտ Կլավերբոյերը հայտարարել էր, որ երկրից հայազգի երկու երեխաներին՝ 12-ամյա Լիլիին ու 13-ամյա Հովիկին Հայաստան արտաքսելը համարվում է երեխաների հիմնարար իրավունքների խախտում: Օմբուդսմենը մտահոգություն էր հայտնել երեխաների ապրելու վայրի և դպրոցի հետ կապված խնդիրների վերաբերյալ: Օմբուդսմենը նկատել էր, որ երեխաների ապագան Նիդերլանդներում է, այս հարցը նա քննարկել է արդարադատության նախարար Մարկ Հարբերսի հետ: Վերջինս իրավունք ուներ երեխաներին տրամադրել բնակության իրավունք, սակայն մինչ օրս հրաժարվել է դա անել:

Խնդրին անդրադարձել էր նաև Նիդերլանդների արքայադուստր Լաուրենտինը: Նա երկրի կառավարությանը կոչ էր արել թույլ տալ երեխաներին մնալ: Չնայած բոլոր արձագանքներին՝ երեխաները Հայաստան պիտի արտաքսվեին սեպտեմբերի 8-ին: