Նորվեգիայի Կրագերո քաղաքը և Գյումրին համագործակցության նոր ծրագրեր կիրականացնեն

 Հայաստանում Ֆրանկոֆոնիայի օրերի շրջանակներում Նորվեգիայի Կրագերո քաղաքի երգչախումբը ելույթ ունեցավ Գյումրիում:  45  երգիչներից կազմված հոգևոր  երգչախմբի համերգը Գյումրու Սբ Աստվածածին (Յոթվերք) եկեղեցում էր:

Մինչ  համերգը  Գյումրու  քաղաքապետ Սամվել Բալասանյանն ընդունեց Կրագերոյից Գյումրի ժամանած պատվիրակությանը՝ Կրագերոյի քաղաքապետ Յոնե Բլիկրայի  գլխավորությամբ: Պատվիրակության կազմում էր նաև նորվեգացի մինսիոներ, հայ ազգի բարեկամ, ցեղասպանության ականատես և բազում որբացած հայերի խնամակալ Բոդիլ Բյորնի թոռը՝ Յուսի Բյորնը: Կրագերոյի քաղաքապետը նշեց, որ այցը  երեք  կարևոր  նպատակ էր  հետապնդում՝ նախ ներկայացնել երգչախումբը, ապա՝ նախանշել համագործակցության հնարավոր  ուղիները՝  հատկապես  դպրոցականների միջև: Քաղաքապետը հայտնեց՝ հաջորդ տարի գյումրեցի  դպրոցականները կհրավիրվեն Կրագերո՝  մասնակցելու  փետրվարին կայանալիք  դպրոցականների շախմատի առաջնությանը, իսկ մյուս նպատակն է Գյումրիում գտնել հենց այն նույն հիվանդանոցը, որտեղ  բարեսիրական գործունեություն է ծավալել  նորվեգացի նշանավոր միսիոներուհի Բոդիլ Կատարինա Բյորնը:

Քաղաքապետ Սամվել Բալասանյանը ողջունեց հյուրերի այցը Գյումրի, ապա հյուրերին ներկայացրեց Գյումրին՝ իր մշակույթով, ավանդույթներով և կոլորիտով: Քաղաքապետն այնուհետ առաջարկեց հետագայում կնքել համագործակցության համաձայնագիր և այդ գործընթացը սկսել առաջիկա օրերին: Քաղաքապետ Սամվել Բալասանյանը հանձնարարեց գտնել կառույցը, հստակեցնել կառույցի հետ կապված բոլոր հարցերը:  Կառույցը գտելու դեպքում, Նորվեգիայի իշխանությունները պատրաստ  են այն վերականգնել, որը հնարավորության դեպքում կծառայի որպես թանգարան:

Սամվել Բալասանյանը  Յուսի Բյորնին, ով Բյոդիլ Բյորնի թոռն է, հանձնեց շնորհակալագիր՝  ի նշան երախտիքի այն բանի համար, ինչ արել է Բյոդիլ Բյորնը՝  փրկելով ճակատագրեր:  

Բյորնը 1905 թվականին եղել է Օսմանյան կայսրությունում, սկզբում` Մեզրե, այնուհետև` Մուշ նահանգներում, որտեղ օգնել է հայ որբերին: Նա ականատեսի աչքերով լուսանկարել ու աշխարհին ներկայացրել է Հայոց ցեղասպանության անմարդկային հետևանքները:

1922 թվականին միսիոներուհին այցելել է Ալեքսանդրապոլ, հիմնել որբանոց, զբաղվել է որբախնամ գործունեությամբ: Հայոց ցեղասպանության թանգարան-ինստիտուտում պահպանվում են նորվեգացի միսիոներուհու մասին վկայող փաստեր ու համապատասխան փաստաթղթերը:

Արմենուհի Մխոյան