Շարլ Ազնավուրին շնորհվել է BraVo երաժշտական մրցանաբաշխության ոսկե արձանիկը

Համաշխարհային երաժշտական մշակույթի զարգացման գործում ավանդի համար BraVo մրցանակաբաշխության ոսկե արձանիկ է շնորհվել ֆրանսահայ շանսոնյե Շառլ Ազնավուրին: Այս մասին հայտնում է РИА Новости-ն։

Մրցանակաբաշխությունը տեղի է ունեցել Մոսկվայի Կրեմլի պալատում․ «Նրա արվեստը ողջ է, նրա երաժշտությունը հիշողության մեջ կմնա հավերժ և երկար-երկար տարիներ կլուսավորի իր լույսով բազմաթիվ սերունդների», - ասել է արարողությունը վարող Ֆիլիպ Կիրկորովը և հավելել, որ այս քայլով հարգանքի տուրք է մատուցվում զարմանահրաշ, չգերազանցված արտիստի լուսավոր հիշատակին:

Ոսկե արձանիկը փոխանցվելու է Ազնավուրի ընտանիքին:

Նշենք, որ BraVo մրցանակաբաշխությունն անցկացվում է երկրորդ անգամ: Այն արտիստների նվաճումները դասական և հանրաճանաչ երաժշտության ոլորտում ընդգծելու համար է:

Ազնավուրը համարվել է դարի լավագույն երգիչ՝ CNN-ի  և  Times ամսագրի վարկածներով:

70 տարվա կարիերայի ընթացքում վաճառվել է նրա երգերի 100 միլիոն ձայներիզ: Ազնավուրը շուրջ 1200 երգերի հեղինակ է, նաև խաղացել է 80 ֆիլմերում, թողարկել է 294 ալբոմ, ելույթներ է ունեցել 94 երկրներում: