Վտանգավոր իրավիճակ՝ Փաշինյանի համար. ինչ ցանես՝ այն էլ կհնձես

Արդեն մի քանի օր է, ինչ Հայաստանում կրքերը եռում են: Փողոցներ փակելը, միջպետական ճանապարհների փակումը, գյուղական բունտերը, գործադուլները, երկաթգծերի փակումը և այլն, դարձել են մեր առօրյան։ Միայն այսօր Երևանի կենտրոնում տեղի են ունենում առաջին հայացքից միմյանց հետ որևէ կապ չունեցող ակցիաներ, սակայն միևնույն ժամանակ, դրանց միավորում է մեկ ընդհանուր հանգամանք՝ բոլոր դեպքերում պատճառը իշխանությունների այս կամ այն քայլն է, որը հանրային լայն ռեզոնանսի առիթ է հանդիսացել: Ցուցարարների մի խումբը, օրինակ, բողոքում է «Սպայկա» ընկերության գլխավոր տնօրենի կալանավորման դեմ: Դատելով եղած փաստերից, հարկերից խուսափելու փաստը ապացուցված չէ, այլ ընդամենը չապացուցված կասկած է։ Չի կատարվել տնտեսական գործառնության աուդիտ, մեկ քննիչի եզրահանգման վրա առաջադրված մեղադրանք է։ Այս փաստը և այն, որ «Սպայկա»-ի փակման արդյունքում հազարավոր մարդիկ մնալու են գործազուրկ, իսկ գյուղացիները մթերման սեզոնի սկզբին կանգնելու են փաստի առաջ՝ բազմաթիվ մարդկանց հանել է փողոց, փակվել էր Տիգրան Մեծի պողոտան, բախում էր տեղի ունեցել ոստիկանների հետ: Այնուհետ ցուցարարները շարժվել են դեպի կառավարության շենք:   

 

 

 

Օրեր առաջ էլ «Հանուն արդարության» նախաձեռնությունը շրջում էր փողոցներով և սևաներկով ներկում հանդիպած կարմիր գծերը։ Նախաձեռնության անդամները պնդում էին, որ կարմիր գծերի վերանայումը հանրային պահանջ է և քաղաքային իշխանությունը ուշադրություն պետք է դարձնի այդ հարցին։ Իրականում, կարմիր գծերը վերացնելու խոստումը վարչապետ Փաշինյանի առանցքային խոստումներից մեկն էր, և եթե նա ձեռնամուխ չլինի ի վերջո այդ խոստումը կատարելուն՝ վաղն այս խնդրով փողոց դուրս եկածների թիվը կարող է շատ ավելի մեծ լինել:

 

Փաշինյանի իշխանության գալը և հատկապես նրա վարչապետական շրջանն աչքի են ընկել «քուչի կռիվ» հիշեցնող գործընթացներով: Եվ ուրեմն, ինչո՞ւ է զարմանում ու բարկանում Փաշինյանը, երբ իր ներկայությամբ քուչի մակարդակի լեզվակռիվ են սկսում չինովնիկները, կամ իր կառավարության կողմից խաբված քաղաքացիները որոշում են սեփական իրավունքները պաշտպանել քուչում՝ փողոցում: Եթե կառավարությունը չգնա կոնկրետ քայլերի, չգտնի ստեղծված իրավիճակից դուրս գալու օպտիմալ լուծումներ, ապա դա առաջին հերթին վտանգավոր է հենց Փաշինյանի համար, քանի որ վերջինիս վարկանիշն օր օրի նվազում է: Ասում ենք Փաշինյանի, քանի որ «Իմ քայլի» վարկանիշ՝ որպես այդպիսին, գոյություն չունի: Փաշինյանի խորտակումը բերելու է «Իմ քայլի» խորտակման, ինչպես եղավ Սերժ Սարգսյանի և ՀՀԿ-ի հետ: