Կոմիտասին նվիրված գիտական նստաշրջանի բացում ԳԱԱ-ում

Այսօր ՀՀ ԳԱԱ նախագահության նիստերի սրահում տեղի ունեցավ Կոմիտասի 150 ամյակին նվիրված գիտական նստաշրջանի բացումն ու լիագումար նիստը: Միջոցառմանը մասնակցում էին գիտնականներ, պաշտոնատար անձինք ու մշակույթի գործիչներ: Զեկուցումներով հանդես եկան մի շարք գիտնականներ, ովքեր անդրադարձան Կոմիտասի կյանքի ու գործունեության՝ մեզ հայտնի ու անհայտ կողմերին, նոր կողմից ներկայացրին Կոմիտասին: 

ՀՀ ԳԱԱ հայագիտության և հասարակական գիտությունների բաժանմունքի ակադեմիկոս, քարտուղար Յուրի Սուվարյանը բացման խոսքում, մասնավորապես, նշեց, որ նման գիտական նստաշրջանների անցկացումը խիստ կարևոր է երկրում գիտության զարգացման համար, մանավանդ, որ նվիրված է Կոմիտասի նման մեծ վաստակ ունեցող հային: Նա նաև կարևորեց այն, որ նստաշրջանին մասնակցում են լուրջ վաստակ ունեցող գիտնականներ, ովքեր գիտական ու ուսումնական շատ տարբեր հաստատաություների ներկայացուցիչներ են:

Զեկուցողներից մեկը՝ Արվեստի ինստիտուտի արվեստաբանության դոցենտ, պրոֆեսոր Աննա Ասատրյանն էր, ով ներկայացավ «Կոմիտասը և հայ երաժշտության հետագա ընթացքը» զեկույցով: 

«Գիտական այս  նստաշրջանը շատ կարևոր քայլ կլինի կոմիտասագիտության զարգացման գործում, որովհետև ևս մեկ առիթ է՝ անդրադառնալու Կոմիտասի ստեղծագործական գործունեությանը, նորովի բացահայտելու Կոմիտասին ու ծանոթանալու նրա գործունեության տարբեր ուղղություններին: Նպատակը մեկն է՝ ևս մեկ անգամ անդրադառնալ Կոմիտասի կյանքին ու գործունեությունը, ներկայացնել համակողմանի ուսումնասիրություն»,- ասաց Ասատրյանը:

Իր զեկույցում Ասատրյանը նախ ներկայացրեց Կոմիտասի գործունեության հիմնական ուղղությունները և, թե ինչպես Կոմիտասը իր գործունեության ուղղություններով կանխորոշեց  հայ երաժշտության հետագա զարգացման ընթացքը. «Բոլորս էլ գիտենք, որ Կոմիտասը հայ ազգային կոմպոզիտորական  դպրոցի հիմնադիրն է, եղել է գիտնական -հետազոտող, նոր շրջանի  հայ երաժշտագիտության հիմնադիրը, առհասարակ, հայ երաժշտական, միջնադարագիտության, երաժշտական ֆոլկլորագիտության հիմնադիրն է: Այդ բնագավառի առաջին գիտական  ուսումնասիրություները նա է կատարել: Նա է ստեղծել ազգային բազմաձայնությունը, բացի դրանից եղել է անկրկնելի խմբավար, ստեղծել է երգչախմբեր ու նաև եղել է հրաշալի երգիչ»,- ընդգծեց Ասատրյանը:

Նա նաև նշեց, որ այս ամենով հանդերձ՝ Կոմիտասը ունեցել է երազանքներ ու նպատակներ, որոնք չի հասցրել իրականացնել. «Այն է՝ երազել է ստեղծել հայկական ազգային կոնսերվատորիա, այսինքն՝  բարձրագույն ուսումնական հաստատություն, որը մասնագետ երաժիշտ կադրեր կպատրաստեր հայ ժողովրդի համար: Բացի այս,  նա շատ կարևորել է իր մանկավարժական գործունեությունը: Եղել է անկրկնելի մանկավարժ և իր մանկավարժական գործունեության մեջ  կարևորել է հայերեն երաժշտական դասագրքերի ստեղծումը: Այդ ուղղությամբ էլ է որոշ քայլեր արել, որոնք, ցավոք, ամբողջությամբ իրականացնել չի կարողացել»:

Մեզ հետ զրույցում Ասատրյանն ընդգծեց, որ նման նստաշրջանները գիտությամբ զբաղվող մարդկանց համար մեծ կարևորություն ունեն, քանի որ տալիս են շփումներ, քննարկումներ, նոր գաղափարներ ու նոր եզրակացություներ. «Այս ամենը գիտությամբ զբաղվող մարդկանց համար կենսական նշանակություն ունեն: Միայն սրանց արդյունքում է, որ կարողանում ենք ստեղծագործել ու նոր գաղափարներ ունենալ»:

Երկօրյա գիտական նստաշրջանում նախատեսվում է  2 տասնյակից ավելի զեկույց, քննարկումներ, մտքերի փոխանակում, ինչպես նաև ԳԱԱ Արվեստի ինստիտուտի տնօրեն Արարատ Աղասյանի «Կոմիտասը հայ նկարիչների և քանդակագործների աչքերով» եռալեզու գրքի շնորհանդեսը:

Լուսինե Մարդոյան