Տիբեթը Չինաստանի միակ շրջանն է, որտեղ կորոնավիրուս չկա. միակ հիվանդը առողջացել է

Տիբեթի ինքնավար շրջանում նոր տեսակի կորոնավիրուսով վարակված միակ անձն առողջացել է և այսօր` փետրվարի 12-ին, դուրս է գրվել հիվանդանոցից: Այս մասին տեղեկացնում է РИА Новостиգործակալությունը` հղում անելով Չինաստանի կենտրոնական հեռուստաընկերությանը:

Տղամարդը հունվարի 24-ին գնացքով Ուհան քաղաքի Ուչան շրջանից գնացել էր Լհասա: Հունվարի 25-ին նրա ինքնազգացողությունը վատացել էր, և նա դիմել էր տեղի հիվանդանոց, որտեղ նրան հսկողության տակ էին վերցրել, իսկ հունվարի 29-ին նրա մոտ հաստատվել էր կորոնավիրուսի ախտորոշում:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Վերջին օրերին ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր ավելանում է, իսկ վարակման դեպքեր են արձանագրվել նաև Չինաստանից դուրս մի շարք երկրներում, ինչը հանգեցրել է համաշխարհային խուճապի: