Ներկրվող հագուստը կթանկանա. ով կտուժի մաքսազերծման կարգի փոփոխությունից

Սեպտեմբերի 1-ից փոխվել են մաքսազերծման մեթոդները և այսուհետ Հայաստան ներկրվող հագուստը մաքսազերծվելու է միջազգային չափանիշներին համապատասխան: Եթե նախկինում ներկրողները տարբեր ապրանքանիշների հագուստ էին ներկրում և 1 կգ-ի դիմաց վճարում 4 դոլար, ապա այժմ նրանք պետք է յուրաքանչյուր ապրանքն առանձին մաքսազերծեն: Հետեւաբար ապրանքի գնից կախված` մաքսազերծման գինը կտատանվի. որոշ դեպքերում կավելանա, որոշ դեպքերում էլ կպակասի:

Ըստ փորձագետների՝ այս հանգամանքը բազմաթիվ խնդիրների, մասնավորապես թանկացումների է հանգեցնելու: Չնայած թեմայի շուրջ առաջացած աղմուկին, պետական կառույցները լռում են և պաշտոնական որևէ մեկնաբանություն չեն տալիս: ԼՈՒՐԵՐ.com-ի հարցին ի պատասխան Պետական եկամուտների կոմիտեից ասացին. «Այդ հարցով, եթե արձագանք լինի, կլինի ՊԵԿ պաշտոնական էջին»: 

ԼՈՒՐԵՐ.com-ի հետ զրույցում «Կասեցում» քաղաքացիական շարժման համակարգող Սամսոն Գրիգորյանն ասաց, որ այս փոփոխություններն ուժի մեջ են մտել ԵԱՏՄ կարգավորումների շրջանակում և սա վերաբերում է սեպտեմբերի 1-ից ներառյալ, արտահանվող երկրից դուրս եկող ապրանքներին միայն. «Եթե այսօր արդեն ապրանքը ճանապարհին է, ապա կմաքսազերծվի նախկին մեթոդներով։ Իսկ սեպտեմբերի 1-ից դուրս եկող ապրանքների դեպքում այլեւս չի լինելու կիլոգրամով մաքսազերծում, հաշիվ ապրանքագրերում (ինվոյս) պետք է նշված լինեն ապրանքների ստույգ քանակները, գները, անվանումներն ու մոդելները։ Ներկրողը պետք է ներկայացնի ինվոյս, բանկային փոխանցումը հաստատող փաստաթուղթ, առուծախի պայմանագիր, ներկրման մասին դեկլարացիա ինչը թղթաբանական քաշքշուկ կառաջացնի և քանի որ պահանջվածը հնարավոր չէ ապահովել Թուրքիայից ներկրելու դեպքում, հետևաբար այնտեղից ներկրվող հագուստը կթանկանա: Բացի այդ, ինֆորմացիայի թերի հայտարարագրումը կբերի վարչարարության կիրառման»,- նշեց նա: 

Նրա խոսքով՝ այս փոփոխությունների արդյունքում ներկրողներն այլևս չեն կարող էժան և թանկ ապրանքանիշի հագուստը նույն գնով մաքսազերծել. «Հայաստանն արգելում է ներմուծել կեղծ բրենդային ապրանքներ: Հակառակ դեպքում ներմուծված կեղծ բրենդային ապարանքները չբացահայտվելու դեպքում կմաքսազերծվեն բրենդային ապրանքների գներով: Իսկ բացահայտվելու դեպքում կունենա ցավալի հետևանքներ՝ ապրանքի առգրավում, ոչնչացում: Սակայն դա իր առավելություններն ունի, քանի որ հիմա էժան ապրանքը թանկից կտարբերվի»,- ասաց Գրիգորյանը՝ ընդգծելով, որ ի սկզբանե սխալ էր բոլոր տեսակի և արժեքի հագուստները միևնույն գնով մաքսազերծելը։ 

Նա ենթադերեց, որ թանկացումը, հավանաբար, կանդրադառնա միջին և թանկ սեգմենտի ապրանքների գների վրա, իսկ էժան արտադրանքի վրա չի ազդի։

Համացանցի տարբեր խմբերում ներմուծող գործարարներն իրենց մտահոգությունն են հայտնում՝ նշելով, որ դեռևս հայտնի չէ, թե ինչպես է փոփոխությունն ազդելու բիզնեսի վրա: Սակայն, համբերտար սպասում են առաջին մատակարարումներին, որից հետո ամեն բան պարզ կլինի։

«Իրազեկ և պաշտպանված սպառող» ՀԿ-ի նախագահ Բաբկեն Պիպոյանն էլ մեզ հետ զրույցում նշեց, որ նոր կարգավորումներն ավելի շատ խնդիր են տնտեսվարող սուբյեկտների համար, ոչ թե սպառողների. «Սպառողների համար այս փոփոխությունն ունի առավելություն և թերություն: Առավելությունը նրանում է, որ որակի հետ կապված որոշակիորեն հստակեցում կլինի, կավելանա ապրանքների անվտանգությունը, կնվազի կեղծման հավանականությունը , իսկ բացասականն այն է, որ կունենանք գնաճ: Այստեղ արդեն պետք է Էկոնոմիկայի նախարարությունն իր դերը խաղա՝ լուծելով և կարգավորելով նոր շուկաների բացման, այդ շուկաներ դուրս գալու հարցերը»,-ընդգծեց փորձագետը:

Ըստ նրա՝ ապրանքների թանկացման նախնական գնահատական հնարավոր չէ տալ. հնարավոր է որոշ ապրանքների դեպքում լինի օրինակ՝ 20% գնաճ, որոշների դեպքում՝ 5%, հետևաբար միջինացման գնահատկան տալը ճիշտ չէ:

Սոնա Հարությույան