18 տարին ի՞նչ է, ցմահ ազատազրկման պետք է դատապարտվի հայրենիքին ու զինվորին թիկունքից դավաճանածը․ MediaHub

MediaHub-ը գրում է․

Լրտեսության համար մեղադրվող Սարգիս Գալստյանը դատապարտվել է 18 տարվա ազատազրկման։ Նախորդ տարվա սեպտեմբերին Արցախի ժողովրդի դեմ իրականացված ադրբեջանական էթնիկ զտումից հետո, Սարգիս Գալստյանն ու կինը՝ Մարգարիտա Շահրամանյանը, վճռական որոշում էին կայացրել մնալ Ադրբեջանի կողմից օկուպացված Ստեփանակերտում, ապրել համակեցությամբ։ Ավելին, ամուսիներն արցախցիներին վերադառնալու կոչեր էին անում։ Սակայն, այս տարվա ապրիլին նրանք Կարմիր խաչի միջազգային կոմիտեի ուղեկցությամբ ևս տեղափոխվել են Հայաստան և հենց Գորիսում ձերբակալվել ԱԱԾ կողմից։ 

«Ես չեմ կարող ասել թե ո՞րն էր մնալու առաքելությունը, եթե մի ամբողջ ժողովուրդ, այսպես ասած, սրի մատնված, ստիպված լքեց սեփական բնակավայրը։ Հիմա եմ վերլուծում, որ այդ օրերին, երբ համատարած խուճապ էր, բոլորը փորձում էին վառելիք գտնել, դուրս գալ օր առաջ, Սարգիսը բավականին հանդարտ էր ու դուրս գալու մասին չէր խոսում։ Ընդհանրապես, ինքը տեսակով այնպիսին էր, որ զուսպ էր ու շատ չէր հաղորդակցվում։ Այստեղ մեջբերեմ ժողովրդական հայտնի խոսքը՝ «վախեցիր այն գետից, որ ո՛չ խշշում է, ո՛չ թշշում»։ Շատ թե քիչ ճանաչելով նրան, ինձ համար անպատկերացնելի չէր, սպասելի էր, այսինքն լսելով լրտեսության մասին՝ չեմ զարմացել»,- MediaHub-ի հետ զրույցում ասաց Սարգիս Գալստյանի հետ աշխատած գործընկերներից մեկը։ 

Սարգիսն ու Մարգարիտան պարբերաբար տեսանյութեր էին հրապարակում ուրվական դարձած Ստեփանակերտի փողոցներից, գերեզմաններից, մեկ-մեկ իրենց զբոսանքից ու առօրյայից։

Գործընկերը կասկած չունի, որ ամուսիններն այնտեղ մնացել են ադրբեջանցիների առաջարկով, կամ գուցե պարտադրանքով։

«Սակայն, երբ հասկացել են, որ այլևս նրանք պետք չեն, ուղարկել են Հայաստան։ Ինձ իսկապես դժվար է պատկերացնել, թե ինչ տվյալներ կարող էին փոխանցված լինել։ Որովհետև գիտեք, ինձ ևս տեղեկություններ են հասել, որ լրտեսությամբ զբաղվել է 44-օրյա պատերազմից առաջ։ Սաքոն միշտ բարձր պաշտոններ է զբաղեցրել և չի բացառվում, որ հույժ կարևոր տեղեկություններ տված կլինի։ Չեմ ուզում մեղք վերցնել իմ վրա, բայց եթե իրոք դա ճիշտ է, ապա 18 տարին ի՞նչ է, ցմահ ազատազրկման պետք է դատապարտվի հայրենիքին ու զինվորին թիկունքից դավաճանած ցանկացած մեկը»,- նշեց մեր զրուցակիցը։ 

Հիշեցնենք, որ ըստ մեղադրանքի՝ Գալստյանը  2020 թ-ից հավաքագրվել է օտարերկրյա պետության հատուկ հետախուզության ծառայությունում և լրտեսել: Նրա կինը՝ Մարգարիտան ազատության մեջ է։