Դանակահարություն` Երևանում. կա 2 վիրավոր

Երեկ՝ նոյեմբերի 2-ին, արտակարգ դեպք է տեղի ունեցել Երևանում: Ժամը 18:10-ի սահմաններում «Սուրբ Աստվածամայր» բժշկական կենտրոնից ոստիկանության Մաշտոցի բաժին ահազանգ է ստացվել, որ «կրծքավանդակի թափանցող ծակած վերք և ձախ ձեռքի ծակած վերք» և «կրծքավանդակի շրջանի ծակած վերք» ախտորոշմամբ իրենց մոտ են տեղափոխվել 2 քաղաքացի:

Ինչպես հայտնում է Shamshyan.com-ը, հիվանդանոց է մեկնել ոստիկանության Մաշտոցի բաժնի օպերատիվ խումբը՝ բաժնի պետ Անդրանիկ Շահբազյանի գլխավորությամբ:

Ժամանել է նաև Հայաստանի քննչական կոմիտեի Երևան քաղաքի քննչական վարչության Աջափնյակ և Դավիթաշեն վարչական շրջանների քննչական բաժնի խումբը՝ ավագ քննիչ Կարապետյանի գլխավորոթյամբ:

Ոստիկաններն ու քննիչները պարզել են, որ վիրավորներն են Երևանի բնակիչներ, 32-ամյա Դավիթ Հովսեփյանը և 31-ամյա Գեորգի Բալաայրումյանը:

Հիվանդանոցում ոստիկաններին և քննիչներին հայտնել են, որ վերջիններս գտնվում են վիրահատական շրջանում և ի վիճակի չեն կատարվածի մասին բացատրություններ տալու:

Մինչ բժիշկները պայքարում էին նրանց կյանքի համար, Մաշտոցի ոստիկաններն ու քննիչները, ձեռնարկելով անհրաժեշտ օպերատիվ-հետախուզական և քննչական համատեղ միջոցառումներ, պարզել են, որ նույն օրը՝ ժամը 17:00-ի սահմաններում, Հասրաթյան փողոցում վիճաբանություն է տեղի ունեցել նշված անձանց և Ավան- Առինջի բնակիչ, 40-ամյա Ալբերտ Սևյանի միջև, որի ժամանակ էլ վերջինս իր մոտ եղած դանակով հարվածել է նշված անձանց:

Ոստիկանության Մաշտոցի բաժնի քրեական հետախուզության բաժանմունքի ծառայողների կողմից անցկացրած բացատրական աշխատանքների արդյունքում Ա. Սևյանը ներկայացել է ոստիկանության Մաշտոցի բաժին, որտեղից էլ նրան տեղափոխել են քննչական բաժին, որտեղ փաստի առթիվ նյութեր են նախապատրաստվում: