Մահացել է փրկարարական ծառայության գնդապետ Կարապետ Կարապետյանը

Արտակարգ իրավիճակների նախարարությունը խոր ցավով տեղեկացնում է իր աշխատակցի՝ ԱԻՆ Փրկարար ծառայության բնակչության պաշտպանության և աղետների ռիսկի նվազեցման վարչության տեխնածին վթարների բաժնի պետ, փրկարարական ծառայության գնդապետ Կարապետ Ռազմիկի Կարապետյանի վաղաժամ մահվան մասին:

Նախարարության ղեկավարությունը և աշխատակազմը ցավակցում ու վշտակցում են նրա ընտանիքին, հարազատներին ու գործընկերներին:

«Գնդապետ Կարապետյանը, որպես սպա, որպես մարդ անմնացորդ է ծառայել մեր երկրին և ժողովրդին: Բոլորիս անունից խորապես ցավակցում եմ նրա մերձավորներին, բարեկամներին և ընկերներին»,- ԱԻ նախարար Անդրանիկ Փիլոյան:

Կարապետ Կարապետյանը փորձառու, բարձրակարգ մասնագետ էր, սրտացավ ու նվիրված իր գործին: Գործընկերների խոսքերով՝ իր մարդկային բարձր հատկանիշների, համեստության, աշխատասիրության ու նվիրման շնորհիվ վայելում էր բոլորի սերն ու հարգանքը:

Փրկարարի նրա կերպարը, օրինակելի պետական ծառայողի, հարազատ մարդու պայծառ հիշատակը մշտապես կմնա համակարգի աշխատողների հիշողության մեջ:

Կարապետ Ռազմիկի Կարապետյանը ծնվել էր 1965թ. օգոստոսի 8–ին, ք. Երևանում:

1989 թվականին ավարտել էր Երևանի պոլիտեխնիկական ինստիտուտը, ինժեներ-քիմիկ-տեխնոլոգի որակավորմամբ, ապա 2003 թվականին ՌԴ Ճառագայթային, քիմիական և կենսաբանական պաշտպանության Զինվորական համալսարանը՝ զինվորական և ադմինիստրատիվ կառավարում մասնագիտությամբ:

1999 թվականից առ այսօր աշխատում էր Արտակարգ իրավիճակների համակարգում՝ արժանանալով ավագ լեյտենանտից մինչև փրկարարական ծառայության գնդապետի կոչմանը:

Ամուսնացած էր, ուներ երկու զավակ:
***

Հոգեհանգստի արարողությունը տեղի կունենա դեկտեմբերի 15-ին, ժամը 18:00-ից մինչ 20:00-ն «Սան Լազարո» սգո սրահում (Աջափնյակ վարչական շրջանում)։

Հուղարկավորությունը տեղի կունենա նույն վայրից, դեկտեմբերի 16-ին, ժամը 13:00-ին: