Վրաստանը որոշել է ամրապնդել Ադրբեջանի հետ համագործակցությունը պաշտպանության ոլորտում

Վրաստանի պաշտպանության նախարար Իրակլի Ղարիբաշվիլին հանդիպել է Վրաստանում Ադրբեջանի արտակարգ և լիազոր դեսպան Ֆայգ Գուլիևի հետ: Այս մասին հաղորդում են ադրբեջանական ԶԼՄ-ները:

Հանդիպման ընթացքում Ի. Ղարիբաշվիլին շնորհավորել է ադրբեջանցի դիվանագետին դեսպանի պաշտոնում նշանակվելու կապակցությամբ և հաջողություններ մաղթել նրան:

Հանդիպման ընթացքում քննարկվել են Վրաստանի և Ադրբեջանի միջև բարեկամական և ռազմավարական հարաբերությունները: Կողմերը քննարկել են նաև երկու երկրների պաշտպանության նախարարությունների միջև առկա համագործակցության դրական դինամիկան:

Ղարիբաշվիլին և Գուլիևը նաև քննարկել են պաշտպանության ոլորտում համագործակցության մասին համաձայնագրի կնքման և ռազմական կրթության ոլորտում կապերի խորացման կարևորության հարցերը։