Համաճարակը հանգեցրել է մարդու իրավունքների աննախադեպ խախտումների․ ՄԱԿ-ի գլխավոր քարտուղար

Կորոնավիրուսի համաճարակը հանգեցրել է մարդու իրավունքների խախտումների աճին ամբողջ աշխարհում, Ժնևում ՄԱԿ-ի Մարդու իրավունքների խորհրդի 46-րդ նստաշրջանի բացման ժամանակ ասել է  ՄԱԿ-ի գլխավոր քարտուղար Անտոնիո Գուտերեշը:
«Պանդեմիան հստակ ցույց տվեց մեր մարդկային ընտանիքի և մարդու իրավունքների ողջ սպեկտրի՝ քաղաքացիական, մշակութային, տնտեսական, քաղաքական և սոցիալական փոխկապակցված բնույթը: COVID-19- ը սրել է նախկինում առկա բացերը, խոցելիություններն ու անհավասարությունները, ինչպես նաև ստեղծել է նոր մարտահրավերներ, այդ թվում՝ մարդու իրավունքների ոլորտում: Մենք ականատես ենք լինում խախտումների արատավոր շարքի», - ասել է նա: Գլխավոր քարտուղարի խոսքով՝ աշխատանքի կորուստը, պարտքերի աճը և եկամտի կտրուկ անկումը բառացիորեն գլխիվայր շուռ են տվել հարյուր միլիոնավոր ընտանիքների կյանքը: Համաճարակի հետևանքն առավելապես հարվածել է կանանց, փոքրամասնություններին, հաշմանդամություն ունեցող անձանց, ծերերին, փախստականներին, միգրանտներին: Խնդիրների առաջ են կանգնում նաև դեռահասներ, ովքեր չեն կարող դպրոց հաճախել և սահմանափակ հասանելիություն ունեն տեխնիկական միջոցներին: Աշխարհը ծայրահեղ աղքատության մեջ ընկավ: «Վիրուսը նաև ազդում է քաղաքական և քաղաքացիական իրավունքների վրա և հետագայում սահմանափակում է հասարակական տարածքը: Համաճարակի պատրվակով՝ որոշ երկրների իշխանություններ օգտագործում են անվտանգության և արտակարգ միջոցառումները` այլախոհությունը ճնշելու, հիմնարար ազատությունները անվավեր ճանաչելու, անկախ մամուլը լռեցնելու և գործունեությունը սահմանափակելու համար», - ասել է Գուտերեշը:
Գլխավոր քարտուղարը հիշեցրել է, որ իրավապաշտպանները, լրագրողները, փաստաբանները, քաղաքական ակտիվիստները և նույնիսկ բուժաշխատողները բերման են ենթարկվում, ենթարկվում են քրեական պատասխանատվության և վախի են ենթարկվում, և վերահսկվում՝ կառավարության արձագանքի քննադատության կամ համաճարակին արձագանքելու բացակայության համար: Եվ համաճարակի հետ կապված սահմանափակումներն օգտագործվում են՝ ընտրական գործընթացները խաթարելու, ընդդիմության բողոքները թուլացնելու և քննադատությունները ճնշելու համար: