Հարկավոր է զարգացման հայկական մոդել ստեղծել. Վահե Էնֆիաջյան

Տարածաշրջանում սպասվող զարգացումների մասին ԼՈւՐԵՐ.com-ը զրուցել է Ազգային ժողովի փոխնախագահ Վահե Էնֆիաջյանի հետ։

-Տարածաշրջանն այս պահին փոփոխությունների ո՞ր փուլում է գտնվում, մասնավորապես` Թուրքիան ի՞նչ նպատակներ է հետապնդում։

Տարածաշրջանը վերջին 30 տարվա ընթացքում ամենածավալուն փոփոխությունների շրջանում է։ Թուրքիան նպատակ է հետապնդում գրավել նոր դիրքեր` տնտեսական, քաղաքական, տարածքային և այլն։
Թուրքիան նաև ունի ատոմային էներգիային տիրանալու նկրտումներ, որը մինչ օրս անհաս է հարևան պետությանը։

Տարածաշրջանը աշխարհաքաղաքական փոփոխությունների և ուժերի ազդեցությունների վերախմբագրման փուլում է, և Թուրքիան փորձում է առավելագույնս շահեկան կարգավիճակում հայտնվել։ Թե ինչ հետևանքներով է դա լեցուն տարածաշրջանի համար` պատկերացնում ենք բոլորս։

-Ո՞րն է մեր դերն այս փոփոխություններում, և ի՞նչ զարգացման հիմք պետք է ունենանք։

Մեր առաջնահերթությունները պետք է մնան նույնը։ Մենք պետք է կարողանանք կառուցել արդյունավետ տնտեսություն, որի հիմքում կլինեն նորագույն տեխնոլոգիաները, ժամանակակից գիտատեխնիկական զինանոցն ու, իհարկե, մեր մտավոր ներուժը, որը պետք է գեներացնի նոր մտքեր, առաջարկի նոր լուծումներ ու ճանապարհային քարտեզը մշակելիս առաջնորդվի ինչպես տարածաշրջանում ընթացող գործընթացներով, այնպես էլ խորացնելով մեր հարաբերությունները ռազմավարական մեր գործընկերոջ` Ռուսաստանի Դաշնության հետ։

Գեոպոլիտիկ փոփոխությունների ընթացքում Ռուսաստանը շարունակում է կայուն կշիռ ունենալ միջազգային տարաբնույթ գործընթացներում, որոնց մասնակից է նաև մեր երկիրը։ Թվարկեցի  առաջնահերթություններ, որոնց քաղաքական պատասխանատվությունը ստանձնած թիմն ի զորու չէ իրագործել։

-Ո՞րն է Հայաստանի առաջնահերթությունները, ի՞նչ մոտեցում պետք է ընտրել

Հայաստանը պետք է ձևավորի զարգացման այնպիսի մոդել, որը թույլ կտա լինել մրցունակ` ժամանակակից մրցակցային աշխարհում։ Վստահ եմ, որ մենք այլընտրանք չունենք ու պիտի գնանք առաջ։

Հարկավոր է ունենալ արդյունավետ ու փոխհամաձայնեցված գործող դիվանագիտական հարթակ, ստեղծել տնտեսական նոր հեռանկարներ, նոր միջազգային կապեր։ Փորձել փոխել ձևավորվող մոդելն այնքան, որքան հարկավոր է մեր ինդիվիդուալ մոդելը ստանալու համար։