Ի՞նչ են ասել ԳՇ պետը և ՊՆ նախարարը Կապանի համայնքապետին. Փարսյանը փակագծեր է բացում

Կապանի Գարեգին Նժդեհի անվան հրապարակում Նիկոլ Փաշինյանի հրաժարականի պահանջով՝ այսօր հավաքվել են  հարյուրավոր քաղաքացիներ: Հրապարակում տեղադրվել է «Սատարում ենք հայոց բանակին, պահանջում ենք վարչապետի հրաժարականը» գրությամբ պաստառներ:

«Իմ կարծիքով՝ այսօր յուրաքանչյուր քաղաքացու պետք է մտահոգի տվյալ քաղաքական ճգնաժամային իրավիճակը, քանի որ խաթարվում են պետականության հիմքերը և շատ լուրջ անվտանգային սպառնալիքներ են առաջանում՝ առավել Սյունիքի ու սյունեցու, այնպես էլ՝ ամբողջ երկրի համար»,- իր խոսքում նշեց Կապան համայնքի ղեկավար Գևորգ Փարսյանը:

Նա նշեց, որ  հենց դրանով պայմանավորված՝ կարծում է, որ սյունեցիները պետք է կտրվեն իրենց առօրյայից և ուշադրությունը սևեռեն ներկայիս պատմության ընթացքի վրա, քանի որ այսօր կերտվում է նաև  սերունդների ապագան.

«Շատ կարևոր է, որ մենք ինքներս մեզ հարց ուղղենք, թե ի՞նչ կարգավիճակով երկիր ենք ուզում կառուցել՝ փուչ պոպուլիզմով-հպա՞րտ, թե՞  կառուցողական-կայուն երկիր: Եվ պատահական չէ, որ այսօրվա հանրահավաքի խորագիրը «Սատարում ենք հայոց բանակին, պահանջում ենք Նիկոլի հրաժարականը»-ն է, քանի որ ամբողջ ազգի առաջին և գլխավոր անվտանգության երաշխավորը ՀՀ բանակն է, որը նույնպես այս քաղաքական իշխանության անշունչ ամբիցիաների և անպատասխանատու հայտարարությունների պատճառով կանգնել է լուրջ խնդիրների առջև»:

Կապան համայնքի ղեկավարն անդրադառնալով ՀՀ ԶՈՒ Գլխավոր շտաբի (ԳՇ)՝ Փաշինյանի հրաժարականի պահանջին՝ նշեց.

«Գլխավոր շտաբը պահանջում է Նիկոլ Փաշինյանի և նրա կառավարության հրաժարականը, իսկ Նիկոլը ուզում է ծառայությունից հեռացնել ԳՇ պետ Օնիկ Գասպարյանին և արդեն իսկ հեռացրել է ԳՇ պետի առաջին տեղակալին, որին երկու երեք ամիս առաջ հերոսի կոչում են պարգևել:

Ստեղծվել է մի կազուսային իրավիճակ.  քաղաքական իշխանության և Գլխավոր շտաբի մեջ առաջացել է մի անջրպետ, և այսօր ես ձեզ կներկայացնեմ մի իրողություն, որի մասին լայն հասարակական շրջանակներում երբևիցե չեմ խոսել (խոսել եմ իմ նեղ շրջապատում, դրա մասին գիտեն իմ ընկերները),  բայց քանի որ այսօր արդեն այս վիճակն է տիրում երկրում, այդ անջպետն է Գլխավոր շտաբի և քաղաքական իշխանությունների միջև, հարկ եմ համարում ձեզ այդ իրողության վերաբերյալ տեղեկացնել:

Դա ուղիղ կապ ունի Գլխավոր շտաբի պետ Օնիկ Գասպարյանի անձին, նրա նվիրվածությանը, հայրենասիրությանը և ներկայիս քաղաքական այս իշխանությունների վերաբերմունքին՝ մեր բնակավայրերի, մեր ժողովրդի նկատմամբ:

Ինչպես գիտեք,  սեպտեմբերի 27-ին սկսվեց այս չարաբաստիկ պատերազմը, բոլորս լծվեցինք մեր հայրենիքի պաշտպանությանը և փորձեցինք հաղթանակ կերտել:  Ցավոք սրտի, չստացվեց: Արդեն հոկտեմբերի 17-18-ին սկսեցինք կազմակերպել Կապանի պաշտպանությունը. հարյուրավոր կապանցիներ կամավորագրվեցին, ինչպես նաև եկան-սատարեցին Քաջարանի մեր ընկերները:

Նոյեմբերի 9-ին կնքվեց այդ համաձայնագիրը, որտեղ հստակ ասվում էր առաջին կետով, որ Զինված ուժերը կանգնում են այնտեղ, որտեղ այդ պահին կանգնած են, և մենք, բնականաբար, մինչև նոյեմբերի 9-ը զբաղեցրել էինք այնպիսի բնագծեր, այնպիսի բարձունքներ, որ ամբողջովին ապահովում էինք մեր բնակավայրերի ու բնակիչների անվտանգությունը»:

Գևորգ Փարսյանը նշեց, որ իր մոտ նոյեմբերի 9-ից հետո մտավախություն կար, որ հնարավոր է՝ դեկտեմբերի 1-ին նախորդող դեպքերի նման, իրենց ևս հրահանգվի զիջել այդ բնագծերը, և  դրա համար խնդրում է հանդիպում Օնիկ Գասպարյանի հետ.

«Նոյեմբերի 23-ին թե 24-ին, մեր գեներալ Վալերի Քոչարյանի հետ հանդիպեցինք Օնիկ Գասպարյանին Թասի ոլորանների սկզբում՝ դեպի Գորիս տանող աջ հատվածում:  Ներկա էին նաև այսօվա Նիկոլի հրաժարականը պահանջող Գլխավոր շտաբի գրեթե բոլոր գեներալները, կորպուսի հրամանատարները և ինչպես նաև՝ վարչության պետերը: Օնիկ Գասպարյանին ես հարց տվեցի, թե այս բնագծերի հետ կապված ի՞նչ ճակատագրեր է լինելու: Գեներալը, շտաբի պետ Օնիկ Գասպարյանը պատասխանեց, որ ինքը շատ լավ հասկանում է այդ բնագծերի և այդ անկլավի կարևորությունը մեզ համար, դրա կարևորությունը Կապանի, Կապանի բնակավայրերի համար:

Ճիշտ է, ասեց,  Զինված ուժերը շատ բան անել չեն կարող, որովհետև այսուհետ պետք է դիվանագետները փորձեն քննարկումների արդյունքում հարցեր լուծել, բայց, միանշանակ, այդ անվտանգության գոտի հատվածը չպիտի էլ քննարկվի բանակցությունների ընթացքում. ոչ միայն չպետք է քննարկվի, այլ եթե անհրաժեշտությունն էլ լինի՝  կռիվ ենք տալու այդ բնագծերի և այդ անվտանգության գոտու համար. ո՛չ մի պարագայում այդ անկլավը չենք զիջելու:  Ասեցի՝ լավ, ի՞նչ ենք անելու, ասեց՝ ամրանում ենք:

Եվ մենք սկսեցինք ամրանալ: Ամրացանք, կառուցեցինք երկրորդ, երրորդ պաշտպանական բնագծերը, դիրքերն առաջ տվեցինք, մեզ համար ավելի շահեկան բարձունքներ գրավեցինք:  Եվ ի՞նչ տեղի ունեցավ. դեկտեմբերի 15-16-ին մեզ հյուր եկավ մեր խաղաղապահ զորքերից ռուս բարեկամներից մեկը և հարցրեց մեզ՝ «Ե՞րբ եք պատրաստվում այդ բնագիծը զիջել»: Ես մնացի շվարած. ասեցինք՝ այսի՞նքն, ո՞նց թե զիջել…  Ասեց՝ տեղյակ չե՞ք,  ձեր քաղաքական ղեկավարությունը ձեզ չի՞ ասել:

Ես, կարելի է ասել, բոլոր ինձ հասանելի մեթոդները կիրառեցի՝ թե՛ անձնական կապերը, թե՛ հրամկազմի հետ քննարկելը,  որ մենք ոչ մի կերպ այդ բնագծերը չզիջենք, որովհետև ես շատ լավ հասկանում էի՝ զիջելու պարագայում մենք ունենալու ենք այն խնդիրները, ինչն էսօր ունենք՝ օդանավակայանի, ճանապարհների հետ կապված և ընդհանուր տրամադրությունների հետ կապված:

Եվ բոլոր մեթոդները փորձելով՝ հասկացա, որ տարբերակ չի մնում, և մենք փորձեցինք վերջին տարբերակը՝ այն տարբերակը, որ ես ընդհանրապես չեմ սիրում և չեմ ընդունում. դա ճանապարհներ փակելու տարբերակն էր: Ես ասել եմ ու ասում եմ՝ Նիկոլի հետ էդ ճանապարհ փակելը եկել է,  իր հետ էլ պետք է վերանա: Մենք որոշեցինք ամսի 17-ին մայրուղին փակել, որպեսզի լսելի լինենք,  ու գիտե՞ք՝ ամենացավալին որն է, որ այդ տարբերակն աշխատեց: Սա ցավալի երևույթ է, որ այս երկրում, այս իշխանությունների օրոք, եթե դու ուզում ես լսված լինել, պիտի ճանապարհը փակես:

Ու այո՛, այդ օրը հանդիպում կայացավ Պաշտպանության նախարարի (Վաղարշակ Հարությունյանի,- Զ.Դ.) հետ: Համայնքի ղեկավարներով հանդիպեցինք, մեր զայրույթը հայտնեցինք իրեն, փորձեցինք ամեն ինչ, որ չզիջենք,  նույնիսկ հասավ այն պահը, որ ասեցինք՝ իսկ եթե ընդհանրապես մենք այդ հրամանը չենք կատարում և չենք զիջում այդ դիրքերը, ապա այդ դեպքում՝ ի՞նչ:  Նախարարի խոսքն այսպիսին էր, որ ես չեմ կարող ինչ-որ մեկին ասել՝ զիջեք, թե չզիջեք, բայց ոչ մեկին խորհուրդ չեմ տալիս դեմ լինել:  Էլի նույն ձևի հիասթափված, ապշած՝ էս թե՛ նախարարից, թե՛ իշխանություններից… մի խոսքով, գիտեք, որ ամսի 18-ին մենք այդ դիրքերը զիջեցինք, և այսօրվա դրությամբ ունենք այն, ինչ ունենք:

Ի դեպ, նախարարի հետ հանդիպման ժամանակ ներկա էին այն գեներալների մի մասը, ովքեր այդ օրը ԳՇ պետի հետ ինձ հետ հանդիպման էին. իրենք ընդհանրապես տեղյակ չէին, տեղյակ չէր ԳՇ պետը:

Այսինքն՝ ասածս այն է, որ այսօր այն մարդը, ով մտահոգ է մեր տարածաշրջանի համար, ով հայրենասեր է, նվիրված է իր գործին, այսօրվա դրությամբ այդ մարդուն ուզում են հեռացնել»:

Հիշեցնենք՝ երեկ կապանցիները վրաններ էին տեղադրել Գարեգին Նժդեհի անվան հրապարակում՝ կրկին նույն պահանջով:

Մանրամասները՝ տեսանյութում