Գործ ունենք մարդաքանակ ցույց տալու մտադրության հետ. իրավապաշտպանը՝ երեխաների ներգրավվածության մասին

Մարտի 20-ին վարչապետ Նիկոլ Փաշինյանը այցելել էր Արագածոտնի մարզ և հանդիպում-քննարկումներ ունեցել մարզի բնակիչների հետ: Հատկանշականն այն է, որ հանդիպմանը ներկա էին մեծ թվով երեխաներ:

ԼՈՒՐԵՐ.com-ի հետ զրույցում իրավապաշտպան Ռուբեն Մելիքյանն ասաց, որ տեսարանը տհաճ էր, և կարևոր է՝ արդյոք նրանց ծնողները ներկա էին, թե ոչ:

«Իրականում ծնողները ցանկացած քաղաքական միջոցառման մասնակցելիս իրավունք ունեն լինել իրենց երեխաների հետ, և երեխաները կարող են իրենց ծնողների ուղեկցությամբ ներկա գտնվել նման միջոցառումներին: Բայց միջազգային ստանդարտն այն է, որ խոսքը վերաբերում է այն երեխաներին, որոնք ունակ են իրենց զարգացման մակարդակով, տարիքով ընկալել միջոցառման էությունը: Մենք տեսնում ենք շատ ավելի փոքր տարիքի երեխաների, քան կարող են թեկուզ ամենանվազ մակարդակով գիտակցել քաղաքական պրոցեսների էությունը, այսինքն՝ սա հիմք է տալիս ենթադրելու, որ գործ ունենք ընդամենը մարդաքանակ ցույց տալու մտադրության հետ»,- ընդգծեց Մելիքյանը:

Իրավապաշտպանը վստահ է՝ այդ այցը քարոզարշավ էր, սակայն արտահերթ ընտրությունների մասին խոսելու որևէ իրավական հիմք չունենք այս պահին. «Նախընտրական քարոզչության բնույթի հայտարարություններ էին արվում, միևնույն ժամանակ դրանից չի կարելի հետևություն անել, որ անպայման ընտրություններ լինելու են, որովհետև մենք ընտրություններ նշանակելու մասին որևէ իրավաբանական փաստ չունենք: Այն ժամկետը, որը հայտարարվեց ֆեյսբուքյան էջով, այդ ժամկետում արտահերթ ընտրություններ անցկացնելու համար  գործընթացը կարող է սկսել ամենաշուտը մոտ մեկ ամիս հետո, այսինքն՝ մեկ ամսվա ընթացքում այս ուղղությամբ որևէ բան արվել չի կարող: Եվ ես ամենևին չեմ բացառում՝ հաշվի առնելով երկրի ղեկավարի պաշտոնը զբաղեցնողի նախորդ վարքագիծը, որ ինչ-որ պատրվակով կարող է արտահերթ ընտրություն չանցկացվել: Այսօր մենք արտահերթ ընտրությունների մասին խոսելու որևէ իրավական հիմք չունենք, և քաղաքական տեսանկյունից արտահերթ ընտրությունները փաստ համարելը արդարացված չէ»,- ասաց իրավապաշտպանը:

Հիշեցնենք, որ Փաշինյանն այցելել էր Արագածոտնի մարզի Ներքին Բազմաբերդ, Նոր Եդեսիա, Ուջան, Բյուրական, Կարբի և Օհանավան համայնքներ: Վերջինս  հանդիպել էր տեղի բնակիչներին, անդրադարձել երկրում ստեղծված իրավիճակին, արցախյան պատերազմի հանգամանքներին և առաջիկա ծրագրերին: 

Արփինե Հակոբյան