«Լուսանկարների մեջ, ամենևին, պետք չէ իմաստ փնտրել». տեղի ունեցավ Սպենդիարյանի տուն-թանգարանի նախաձեռնությամբ «Երևանյան Էտյուդներ» ցուցահանդեսը

Թանգարանների միջազգային օրը՝ մայիսի 18-ին, Սպենդիարյանի տուն-թանգարանի տնօրեն Մարինե Օթարյանի կողմից նախաձեռնությամբ տեղի ունեցավ նկարների ցուցահանդես: Տուն-թանգարանի հարակից պուրակը լեփ-լեցուն էր ցուցահանդեսի լուսանկարների հեղինակներով, այնպես էլ նրանց ոգևորող մտերիմներով և հարազատներով:

«Այս անգամ մենք մի փոքր փոխել ենք մեր միջոցառման բովանդակությունը, Ձեզ հրավիրել ենք այստեղ վայելելու և դիտելու շուրջ մեկ ամիս ու կես տևած մրցույթին ներկայացված լուսանկարները»,- այս մասին ցուցահանդեսի բացմանն ասաց Մարինե Օթարյանը: Իսկ, թե ինչով էր պայմանավորված ցուցահանդեսի «Երևանյան էտյուդներ» անվանումը,  տնօրենը բացատրեց. «Մենք հայտարարել էինք Երևանյան Էտյուդներ, քանի որ Սպենդիարյանը, երբ եկավ Երևան, գրեց իր «Երևանյան Էտյուդներ» առաջին սիմֆոնիկ գործը և այն նվիրեց Երևանի առաջին սիմֆոնիկ նվագախմբին»,- ասաց նա:

Կար հոծ բազմություն. մարդիկ, իրար հերթ չտալով, մի նկարից անցնում էին մյուսին, ոմանք փորձում էին որևէ իմաստ փնտրել այս կամ այն լուսանկարի մեջ, ոմանք էլ.... «Լուսանկարների մեջ, ամենևին, պետք չէ իմաստ փնտրել» կարգախոսով էին հիանում ցուցահանդեսի լուսանկարներով:

Ժյուրիի անդամներ Զավեն Խաչիկյանը, Մելիք Բաղդասարյանը, Սամվել Սևադան և Արազ Արթինյանը հայտնեցին առաջին, երկրորդ և երրորդ պատվավոր հորիզոնականները զբաղեցրած մասնակիցների անունները, բոլորին տրվեց պատվոգիր, սակայն դեռ մեկ մրցութային անվանակարգ էլ կար՝ թանգարանի անվանակարգ և այդ տեղը զբաղեցրեց Արման Գասպարյանը, որը  թանգարանի աշխատակիցներին հիացրել էր իր լուսանկարով. «Երբ 1924 թվականին Սպենդիարյանը եկավ Երևան, նա բնակվեց Կոնդում և այնտեղից ոտքով իջնում էր Սուրբ Սարգիս եկեղեցու հարևանությամբ գտնվող Արարատյան թեմի առաջնորդարանի տուն, այնտեղ նրան սենյակ էին տրամադրել, որտեղ էլ հենց գրեց «Երևանյան Էտյուդները»:  Ես շատ էի սպասում, որ լուսանկարների մեջ գոնե մեկ հատ Կոնդի տեսարան լիներ, որ մենք գոնե մտովի տեղափոխվեինք սպենդիարյանական ժամանակաշրջան և մտովի հասկանայինք, թե կոմպոզիտորը, Կոնդի որ ճանապարհով կանցներ: Լուսանկարների մեջ տեսա Կոնդի մի հին կառույց և  մի նեղլիկ փողոց, որով գուցեև 20-ական թվականներին անցել է Սպենդիարյանը»,- ասաց Մարինե Օթարյանը:

Ուշագրավ էր, որ մրցույթին մասնակցում էին ոչ միայն դեռահասներ, պատանիներ, այլև տարիների մեծ փորձ ունեցող նկարիչներ:

Զվարթ Պետրոսյան