Կորոնավիրուսի Լյամբդա֊շտամը արագորեն վարակելու է նրանց, ովքեր դեռ չեն հիվանդացել և չեն պատվաստվել․ Ժեմչուգով

Բժշկական գիտությունների դոկտոր, իմունոլոգ Վլադիսլավ Ժեմչուգովը ռուսական Ռադիո 1-ի եթերում խոսել է կորոնավիրուսի Լյամբդա֊շտամի առանձնահատկությունների մասին: Լյամբդա֊շտամը նախ հայտնաբերվել է Պերուում, Չիլիում, Էկվադորում և Արգենտինայում՝ 2020 թվականի վերջին: Ենթադրվում է, որ պաթոգենի այս տարբերակը պարունակում է մի քանի մուտացիաներ, որոնք ազդում են վարակման աստիճանի վրա: Մինչ այժմ գիտնականները չունեն ապացույց այն մասին, որ նոր շտամը հրահրում է COVID-19- ի ավելի խիստ ընթացք կամ թուլացնում պատվաստանյութերի ազդեցությունը: Ըստ Ժեմչուգովի՝ այս շտամը վիրուսի բնական մուտացիայի գործընթացի արտացոլումն է: «Այն փոխվում է, հարմարվում արտաքին փոփոխվող պայմաններին: Այն ավելի հարմարվող է, կայուն, ավելի վարակիչ, ավելի ընդունակ է տարածվել աշխարհով մեկ», - ասել է մասնագետը: Հետևաբար, այս շտամը, ըստ նրա, արագորեն վարակելու է նրանց, ովքեր դեռ չեն հիվանդացել և չեն պատվաստվել:

Ավելի վաղ Մեծ Բրիտանիայում գրանցվել էին կորոնավիրուսի  Լյամբդա֊շտամով վարակման դեպքեր: Առողջապահության համաշխարհային կազմակերպությունը, որպես «մտահոգիչ» շտամներ, նշել է SARS-CoV-2 չորս մուտացիաներ՝ Ալֆա (բրիտանական), Բետա (Հարավային Աֆրիկա), Գամմա (բրազիլական) և Դելտա (հնդկական) շտամները: Վերջինս շարունակում է մուտացիայի ենթարկվել: