Իրաքի վարչապետի վրա ԱԹՍ-ի միջոցով մահափորձ է կատարվել. ԶԼՄ

Իրաքի վարչապետ Մուստաֆա ալ Քազիմիի նստավայրի տանիքում, որը գտնվում է Բաղդադի կենտրոնում՝ լավ ամրացված «կանաչ գոտում», կիրակի հայտնաբերվել է չպայթած արկ: Ինչպես հաղորդում Է Sky News Arabia հեռուստաալիքը, սակրավորները փորձում են վնասազերծել նրան:

Ինչպես հաղորդում է ՏԱՍՍ-ը, անցած գիշեր Բաղդադում մահափորձ է կատարվել կառավարության ղեկավարի դեմ՝ ականակիր անօդաչուների օգնությամբ: Ալ-Քազիմին չի տուժել, հարձակման հետեւանքով վիրավորվել են վարչապետի անվտանգության ծառայության մի քանի աշխատակիցներ: Նստավայրին նյութական լուրջ վնաս է հասցվել. շենքում կոտրվել են պատուհանները, դուրս են եկել դռները, վնասվել են կառուցատարրերը: Դրանից հետո «կանաչ գոտի» բոլոր մուտքերին զգալիորեն ուժեղացվել են անվտանգության միջոցառումները։

Իրաքի ներքին գործերի նախարարության հայտարարության համաձայն, որը մեջբերում է իրաքյան INA լրատվական գործակալությունը, հարձակման մեջ ներգրավված է եղել երեք անօդաչու սարք, որոնցից երկուսը խոցվել են, երրորդը հայտնվել է նստավայրում: Բացի այդ, հարձակմանը նախորդել է ինտենսիվ փոխհրաձգությունը մայրաքաղաքի կենտրոնում։  Սկզբում հաղորդվում էր, որ վարչապետը վիրավորվել է, սակայն ավելի ուշ նա Twitter-ում գրել էր, որ իր հետ ամեն ինչ կարգին է։

Իրաքի վարչապետի դեմ մահափորձի փորձի դատապարտման եւ աջակցության խոսքեր են հայտնել արաբական եւ համաշխարհային բազմաթիվ առաջնորդներ: