Լուկաշենկոն Ալիևին հայտնել է, որ Մինսկում կկանգնեցվի արձան` ի նշան բելառուս և ադրբեջանցի ժողովուրդների բարեկամության

Նոյեմբերի 8-ին Բելառուսի Հանրապետության նախագահ Ալեքսանդր Լուկաշենկոն զանգահարել է Ադրբեջանի Հանրապետության նախագահ Իլհամ Ալիևին։

Պետությունների ղեկավարները հաստատել են երկկողմ համագործակցության ռազմավարական բնույթը, վերանայել են այս տարվա ապրիլին Բաքվում երկու նախագահների բանակցությունների ընթացքում ձեռք բերված պայմանավորվածությունների կատարումը:

Ալեքսանդր Լուկաշենկոն ողջունել է մեկ տարի առաջ Ադրբեջանի և Հայաստանի միջև երկարաժամկետ հակամարտության ավարտը։ Նա առանձնահատուկ ուշադրություն է հրավիրել խաղաղություն կառուցելու  մեկնարկային գործընթացի կարևորությանը, որը ձեռնտու է երկու երկրներին։

Բելառուսի նախագահն ընդգծել է, որ Հարավային Կովկասում տրանսպորտային հաղորդակցության և տնտեսական փոխգործակցության վերականգնումը պետք է դառնա տարածաշրջանում կայուն խաղաղության հիմքը, ապահովի այնտեղ ապրող բոլոր ժողովուրդների բարեկեցությունն ու անվտանգությունը։

Նախագահ Ալեքսանդր Լուկաշենկոն ցավակցություն է հայտնել ղարաբաղյան երկարատև հակամարտության բոլոր զոհերի ընտանիքներին և ընկերներին, նշել է Ռուսաստանի միջնորդությամբ մեկ տարի առաջ ընդունված հայտարարության բացառիկ նշանակությունը, որը վերջ դրեց արյունահեղությանը։

Բացի այդ, Բելառուսի ղեկավարը Ադրբեջանի նախագահ Իլհամ Ալիևին տեղեկացրել է, որ Մինսկում կկանգնեցվի ծնունդով Գանձակ (Գյանջա) քաղաքի ականավոր իրանցի բանաստեղծ և մտածող Նիզամի Գյանջևիի հուշարձանը՝ ի նշան բելառուս և ադրբեջանցի ժողովուրդների բարեկամության։ .