Ո՞վ չգիտի, թե ինչ կարող էր լինել խորհրդարանական ընտրություններում մեր պարտության պարագայում. Փաշինյան

«Ո՞վ չգիտի, թե ինչ կարող էր լինել խորհրդարանական ընտրություններում մեր պարտության պարագայում։ Մենք բոլորս դա գիտեինք․․․։ Ես հիշում եմ, որ 44-օրյա պատերազմից հետո, երբ քննարկում էին, թե ինչու մենք էսքանից հետո, ընդհանրապես, պիտի մնայինք իշխանության, մեր պատասխանն էր, որ մենք, այո՛, պետք է պահպանենք ժողովրդի մանդատը։ Ինչո՞ւ, որովհետև մենք չպետք է թողնենք նավն ալեկոծված ծովի կենտրոնում, մենք նավը պետք է հասցնենք նավահանգիստ»,- ՏԻՄ ընտրությունների քարոզարշավի կապակցությամբ կազմակերպված ՔՊ-ի դրամահավաք երեկոյի իր խոսում ասաց ՀՀ վարչապետ Նիկոլ Փաշինյանը։

Նա նաև անդրադարձավ Սյունիքը հանձնելու մասին ընդդիմության մեղադրանքներին.

«Էսօր մեզ ասում են՝ Սյունիքը մաս-մաս հանձնում են։ Եկեք նայենք, թե որն է Սյունիքի հանձնման բանաձևը։ 2018 թվականի դրությամբ, Սյունիքի մարզի նախադպրոցական տարիքի երեխաների 4 տոկոսն է ունեցել հասանելիություն մանկապարտեզներին և նախադպրոցական հիմնարկներին, 100 երեխայից 4-ն է կարողացել գնալ մանկապարտեզ։ Էս ա Սյունիքի մարզի հանձնելը»,- ասաց  Փաշինյանը։

Վարչապետը նշեց, որ Սյունիքի մի համայնքում բոլոր երեխաներին կրթական պրոցեսի մեջ ներգրավելու համար կառավարությունը 9 մլրդ դրամի հատկացում է անում։

«Հայաստանի պատմության մեջ չի եղել մի դեպք, երբ կառավարությունը մի համայնքում 9 մլրդ դրամի կրթական ծրագիր իրականացնի»,- ընդգծեց նա։

«Անվտանգությունը թեև մեր ամենախոցելի տեղն է, բայց անվտանգության մարտահրավերը ծագում է այն ժամանակ, երբ որ երկրի կրտսեր դպրոցի ավարտած աշակերտների 35 տոկոսը կարդալ չգիտի, 2019 թվ-ի դրությամբ։ 30-ամյա անկախ պետության կրտսեր դպրոցի ամեն 100 աշակերտից 35-ը կարդալ չգիտի։ Էդ ա անվտանգության մարտահրավերը, կամ էդտեղից սերմանված մարտահրավերն ա, որ ջարդվելա մեր գլխին»,- ասաց Փաշինյանը։