Թող հրապարակեն, ո՞վ է ում ձեռքը բռնել. էս տարուց ավել է, փաստեր են հրապարակում. Փաշինյանը՝ Սերժ Սարգսյանի մասին

Մեն երջանիկ չենք, որ Հայաստանն ինքը Արցախի նախկին ղեկվարների ձեռամբ, որոնք հետո դարձան ՀՀ ղեկավարներ, դուրս մղվեց բանակցային գործընթացից: Այս մասին այսօր՝ հունվարի 24-ին, մամուլի ասուլիսում նշեց ՀՀ վարչապետ Նիկոլ Փաշինյանը:

«Մենք դա համարում ենք բանակցային գործընթացի համար աղետաբեր: Բայց այսօր փաստն այն է, որ դա է իրավիճակը: Մենք չենք կարող ասել, որ Արցախի իշխանությունն է դրա համար պատասխանատու կամ պատասխանատվություն չունի: Պարզ է, որ Հայաստանն իր կարգավիճակում ունի առաջնային պատասխանատվություն: Ո՞վ է դա երբեւէ կասկածի տակ դրել»,-ասաց նա:

Դիտարկմանը, որ աղետալի բանակցություններում մասին վարչապետի հայտարարություններից հետո մամուլում տեղեկություններ կային, որ Սերժ Սարգսյանը պատրաստվում է բանակցություններից գաղտնիքներ բացահայտել, որոնք հերքում են ձեր հայտարարությունները, Փաշինյանն ասաց. «Այն ամբողջ ինֆորմացիան, որին կարող է տիրապետել Սերժ Սարգսյանը, դրան տիրապետում եմ ես: Դա իմ սեղանին դրված է 2018 թվականից: Եթե խոսքն ինստիտուցիոնալ բանակցությունների մասին է: Ես բացառում եմ, որ կարող է լինել փաստ, որին ես այսօր չեմ տիրապետում, կամ 2018-ին չեմ տիրապետել: Թող հրապարակեն, ո՞վ է  ում ձեռքը բռնել: Էս տարուց ավել է, փաստեր են հրապարակում, ե՞ւ»:

Հարցին, թե որոնք են Ղարաբաղի հիմնախնդրում Հայաստանի «կարմիր գծերը», արդյոք Հայաստանը հետապնդում է Մինսկի խմբի ձեւաչափով մշակված սկզբունքների այդ թվում ինքնորոշման իրավունքի հիմն վրա խնդրի կարգավորումը, Փաշինյանն արձագանքեց. «Երբեմն ես հայտարարություններ եմ անում, որոնց շարժառիթները մինչեւ վերջ բացահայտելու պատեհություն չի լինում: Ես ուզում եմ, որ այն, ինչ ես ասում եմ այստեղ, եւ այն ինչ ասում եմ բանակցային սեղանի շուրջ, իրարից չտարբերվեն: Վերջերս բանակցային գործընթացին մասնակցած մի պաշտոնյա մի նախադասություն է ասել, որը շատ տպավորվել է: Ասել էր՝ մենք բանակցությունների ժամանակ նենց բաներ ենք խոսում, որ եթե իմացվեր դրա մասին, ՀՀ-ում մեզ կարող է որպես պետական դավաճան դատեին: Ես մտածում էի, որ գուցե ես սխալ եմ արել, որ այդպիսի բաներ չեմ խոսել, բայց հետո տեսել եմ, որ 2018-2019 թվականներին այդ խոսացածները կյանքի կոչելու ժամանակներն են եկել: Մի օր գալու է, որ ասեն՝ էդքան խոսեցինք, դե եկեք անենք արդեն»,-ասաց Փաշինյանը:

Ինչ վերաբերում է հարցին, թե ի՞նչ է  շահելու Արցախը կոմունիկացիաների վերաբացումից եւ արդյոք կան նախադրյալներ առարկայական քայլերի անցնելու համար, Փաշինյանը պատասխանեց. «Արցախը շահելու է անվտանգություն եւ բարեկեցության իր բաժինը»: