«Թվով երեք օրենսդրական նախաձեռնություն եմ դրել շրջանառության մեջ». Արամ Վարդևանյան

Ազգային ժողովի «Հայաստան խմբակցության» պատգամավոր Արամ Վարդևանյանը ֆեյսբուքյան իր էջում գրել է.

«Սիրելի՛ գործընկերներ,

Վերջին մեկ ամսվա ընթացքում թվով երեք օրենսդրական նախաձեռնություն եմ դրել շրջանառության մեջ:

1) Վարչական իրավախախտումների վերաբերյալ օրենսգրքում ամենատարածված բայց ոչ մեծ վտանգ պարունակող իրավախախտումների (մասնավորապես` ճանապարհային երթևեկության ոլորտ) դեպքերում, տուգանքի չափի ՀԻՍՈՒՆ տոկոսը ոչ ուշ, քան տասն օրվա ընթացքում անձի կողմից վճարելու դեպքում՝ տուգանքը համարվում է ամբողջությամբ մուծված:

2) Դատական ակտերի հարկադիր կատարման մասին օրենքում առաջարկում եմ հստակեցնել, որ բանկերի կամ այլ կազմակերպությունների կողմից միակ բնակարանի իրացումն արգելվի, եթե դրա չափը՝ 20 միլիոն դրամ է կամ դրանից պակաս: Այսօրվա կարգավորման համաձայն, միակ բնակարանի իրացման սահմանափակումը վերաբերում է շուրջ 5 միլիոն դրամ կամ պակաս արժեք ունեցող դեպքերին, ինչն այնքան նվազ է, որ չի ծառայում ոչ մի նպատակի ներկայիս սոցիալական պայմաններում: Նույն նախագծով առաջարկվում է, որ բազմազավակ ընտանիքի դեպքում, միակ բնակարանի օտարումն առհասարակ ԱՐԳԵԼՎԻ:

3) Երրորդ նախագիծը վերաբերում է վարչական դատավարության օրենսգրքին ու կրկին ամենատարածված և ոչ էական վտանգ պարունակող վարչական տուգանքների դեպքերին, որպեսզի պետական մարմնինների կողմից վերաքննիչ և վճռաբեկ բողոքներ ներկայացնելու գործիքակազմը սահմանափակվի: Այսինքն անձը որոշ տեսակի վարչական տուգանքի հարցով դիմելով դատարան և ստանալով դրական վճիռ, այլևս չպետք է սպասի առնվազն մեկ տարի վերաքննիչ ու վճռաբեկ դատարններում կրկին պայքարելու համար»: