«Նիկոլ Փաշինյանն ու ՔՊ-ն փոխում են այն ծրագիրը, որով եկել են իշխանության». ԱԺ նախկին պատգամավոր

ԱԺ նախկին պատգամավոր Տաթևիկ Հայրապետյանը ֆեյսբուքյան իր էջում գրել է. «Փաշինյանի դեմ այսօր պետք է ամենաակտիվ կերպով հանդես գան և պատասխաններ պահանջեն արտահերթ ընտրությունների ժամանակ նրան և նրա քաղաքական ուժին երկրորդ հնարավորություն տված քաղաքացիները: Ինչո՞ւ: Փաշինյանը քարոզարշավի ժամանակ չի խոսել ոչ նշաձող իջեցնելու, ոչ Արցախից հրաժարվելու մասին: Այժմ «խաղաղության դարաշրջանի» խոստման տակ նա օգտագործում է իրեն վստահության քվե տվածների մանդատը՝ ամբողջությամբ դեմ գնալով իր և իր կուսակցության առաջարկած ծրագրին: Այն խաղաղությունը, որը խոստանում էր քարոզարշավի ժամանակ, որևէ աղերս չունի ներկայիս «խաղաղության» հետ: Բառը մնացել է նույնը, բովանդակությունը՝ խեղվել և փոխվել է:
Փաստացի, Նիկոլ Փաշինյանը և «Քաղաքացիական պայմանագիր» կուսակցությունը փոխում են այն ծրագիրը, որով եկել են իշխանության և ստացել մանդատ ՀՀ քաղաքացիներից: Իսկ ո՞րն է եղել ՔՊ ծրագիրը Արցախի վերաբերյալ: Մեջբերում եմ՝
«Մոտակա տարիներին մեր գլխավոր խնդիրը պետք է լինի աղետալի պատերազմի հետևանքների վերացումը, ինչպես նաև Արցախի ժողովրդի անվտանգության ապահովումն ու Ղարաբաղյան հակամարտության խաղաղ և համապարփակ կարգավորումը՝ հիմնված Արցախի ժողովրդի ինքնորոշման՝ առանց սահմանափակումների իրականացման վրա, որը բխում է Արցախի ժողովրդի գոյութենական վտանգներին դիմակայելու անհրաժեշտությունից։ Այն փաստը, որ մարդու իրավունքների զանգվածային խախտումների և զանգվածային ոճրագործությունների հետևանքով հայաթափվել են Արցախի բոլոր այն տարածքները, որտեղ հաստատվել է ադրբեջանական վերահսկողություն, մատնանշում է, որ Արցախի ժողովուրդը չի կարող գոյատևել Ադրբեջանի ենթակայության ներքո։
Ղարաբաղյան հակամարտության վերջնական կարգավորումը տեսնում ենք Արցախի ժողովրդի ինքնորոշման իրավունքի լիարժեք իրացման և Արցախի կարգավիճակի վերջնական հստակեցման տեսքով՝ առաջնորդվելով «Անջատում հանուն փրկության» սկզբունքով»:
Եթե 2018 թվականի խոստումների չկատարումը կարելի էր պատճառաբանել կովիդով և պատերազմով, ապա 2021 թվականից ցայսօր չի եղել այնպիսի փոփոխություն, որը հարկադրի ամբողջությամբ փոխել ծրագիրը, այն էլ պետության շահի հետ առնչվող այս հարցի կապակցությամբ: Ադրբեջանը ինչպես խոսել է ուժի և ուժի սպառնալիքի լեզվով, այնպես էլ շարունակում է: Իսկ ի՞նչ է արել իշխող ուժը վերընտրվելուց ի վեր՝ անվտանգության համար: Փաստացի, ոչինչ:
Փաշինյանի դեմ պետք է հանդես գան նաև այն ՔՊ–ականները, որոնք անկախ իրենց տարատեսակ վախերից, չեն տեսնում Արցախ Ադրբեջանի կազմում, հակառակ դեպքում՝ դառնում են այս հանցավոր ծրագրի անբաժան մասը: Դա կարող են անել նաև ոչ հրապարակային: Փաստացի, խաբված են նաև նրանք, քանի որ այլ ծրագրով են եկել իշխանության և այլ բան են խոստացել մարդկանց: Որքան էլ իրենց խաբել են, որ գալիս են նախկինների դեմ պայքարեն, հստակ է, որ պայքարում են ընդդեմ սեփական պետական և անվտանգային շահի, ըստ որի՝ չի կարող լինել Արցախ Ադրբեջանի կազմում:
Չընտրողները այսպես թե այնպես շարունակելու են այս հակապետական ծրագրի դեմ պայքարել՝ թեկուզ շատ տարբեր, երբեմն իրար նույնիսկ հակասող դրդապատճառներից ելնելով: Խնդիրն այն է, որ ընտրողները պետք է իրենց ձայնը լսելի դարձնեն և ցույց տան, որ իրենց այսքան խաբել ու մնալ անպատիժ հնարավոր չէ: Սա է այն ճանապարհը, որը կկանգնեցնի Փաշինյանին»: