Թուրքիան պետք է առանցքային դեր խաղա Ռուսաստանին պատասխանատվության ենթարկելու հարցում․ Պետդեպ

Թուրքիան պետք է առանցքային դեր խաղա ուկրաինական պատերազմի համար Ռուսաստանին պատասխանատվության ենթարկելու հարցում։ Այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Նեդ Փրայսը։

Նրա խոսքով, Թուրքիան եւ ԱՄՆ-ը կարեւոր երկկողմ գործընկերներ են՝ մի շարք ընդհանուր շահերով, հաղորդում է Ahval-ը։

Փրայսը նշել է, որ պետքարտուղար Էնթոնի Բլինքենը մայիսի 18-ին Վաշինգտոնում կհյուրընկալի Թուրքիայի արտգործնախարար Մեւլութ Չավուշօղլուին, եւ նրանք կքննարկեն մի շարք հարցեր, այդ թվում՝ Թուրքիայի «կարեւոր դերը՝ Ռուսաստանին պատասխանատվության ենթարկելու հարցում՝ ժողովրդի, կառավարության եւ Ուկրաինա պետության դեմ նրա պատերազմի համար»:

F-35-երի ծրագրին Թուրքիայի հնարավոր վերադարձի մասին հարցին՝ Փրայսը պատասխանել է, որ ԱՄՆ-ի մոտեցումը չի փոխվի։ «Մենք շատ հստակ հայտնել ենք մեր մտահոգությունները Թուրքիայի՝ Ս-400 համակարգեր ունենալու վերաբերյալ»,- ասել է նա։ «Մենք չենք կարծում, որ Ս-400 համակարգը համապատասխանում է F-35-երի ծրագրին»։