«Մեդվեդչուկը հասկանում է, որ ինքը ո՛չ Ռուսաստանին, ո՛չ Ուկրաինային պետք չէ». Ուկրաինայի նախագահի աշխատակազմ

Ռուսամետ քաղաքական գործիչ Վիկտոր Մեդվեդչուկը, ով կասկածվում է պետական ​​դավաճանության մեջ, ցուցմունք է տալիս իրավապահ մարմիններին, որպեսզի «գոյատեւի», ասել է Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը, փոխանցում է ՈՒՆԻԱՆ-ը։

«Ես կարծում եմ, որ այսօր նա շատ-շատ ինտենսիվ ցուցմունք է տալիս, քանի որ ուզում է ապրել։ Նա շատ վախկոտ մարդ է, ով վախենում է ամեն ինչից։ Նման մարդկանց մոտ միշտ միայն ցուցամոլություն է։ Այսօր մենք տեսնում ենք մի մարդու, ով իսկապես ցանկանում է գոյատևել՝ գիտակցելով, որ ինքը ոչ Ռուսաստանին, ոչ էլ հատկապես Ուկրաինային պետք չէ»,- կարծում է Պոդոլյակը։

Ուկրաինայի նախագահի գրասենյակի ղեկավարի խորհրդականի խոսքով` հիմնական խնդիրներից մեկն է բացահայտել այն մարդկանց, ովքեր օգնեցին Մեդվեդչուկին վերականգնել իր ազդեցությունը 2014 թվականի հեղափոխությունից հետո. «Ինչպե՞ս Մեդվեդչուկի նման մարդը, ով ներքևում էր, նրան ոչ ոք չէր հիշում, 2015-ից մինչև 2018 թվականը դարձավ հզոր մեդիա օլիգարխ։ Հուսով եմ՝ կստանանք պատասխաններ, թե կոնկրետ ով օգնեց նրան օլիգարխ դառնալ թե՛ ԶԼՄ-ներում, թե՛ Ուկրաինայի էներգետիկ ոլորտում։ Առանց օգնության (և ոչ միայն ռուսական կողմից) դա հնարավոր չէր լինի»։

Ապրիլի 12-ին տնային կալանքից փախած Վիկտոր Մեդվեդչուկը ձերբակալվել էր Ուկրաինայի անվտանգության ծառայության կողմից։ Իրավապահների խոսքով՝ նա փորձել է լքել երկիրը զինվորական համազգեստով։ Ապրիլի 16-ին Մեդվեդչուկը կալանավորվել է` առանց գրավի դիմաց ազատ արձակվելու հնարավորության։