Գերմանիան ևս 37 միլիոն եվրո կհատկացնի Ուկրաինային

Գերմանիան հավելյալ 37 միլիոն եվրո կհատկացնի Ուկրաինային՝ վերականգնման համար։ Այս մասին հայտարարել է երկրի տնտեսական համագործակցության եւ զարգացման դաշնային նախարարությունը։

Հայտարարությունն արվել է այն բանից հետո, երբ արտաքին գործերի նախարար Անալենա Բերբոքը հայտարարել է, որ պատերազմի շուտափույթ ավարտը քիչ հավանական է:  Տնտեսական համագործակցության եւ զարգացման դաշնային նախարարության ներկայացուցիչ Ստեֆանի ֆոն Էրլիխը CNN-ին ասել է, որ 37 միլիոն եվրո կուղղվի տարբեր նախաձեռնություններին, մասնավորապես՝

շուրջ 22,5 մլն եվրո՝ էլեկտրացանցերի վերակառուցման համար,

14,4 մլն եվրո՝ Ուկրաինայից տեղահանվածների տների վերականգնման համար,

2 մլն եվրո՝ բժշկական սարքավորումների համար։

Գերմանիայի զարգացման նախարար Սվենյա Շուլցեն ասել է, որ Ուկրաինայի վերականգնումը կպահանջի միջազգային հանրության համերաշխությունը։ «Համաշխարհային բանկը ժամանակին հիմնադրվել է Երկրորդ համաշխարհային պատերազմից հետո Եվրոպան վերակառուցելու համար: Ապագայում այն կարող է կարեւոր դեր խաղալ՝ օգնելով վերականգնել Ուկրաինան»,-հավելել է նա։