ՀՀ-ի հետ խաղաղության պայմանագրի հանձնաժողովում ադրբեջանական պատվիրակության կազմը որոշվել է․ Ալիև

Շաբաթ օրը՝ ապրիլի 23-ին, Եվրամիության խորհրդի նախագահ Շառլ Միշելը զանգահարել է Ադրբեջանի նախագահ Իլհամ Ալիևին, հայտնում է պետության ղեկավարի մամուլի ծառայությունը։

 «Հեռախոսազրույցի ընթացքում կողմերը քննարկել են Շառլ Միշելի նախաձեռնությամբ ապրիլի 6-ին Բրյուսելում կայացած եռակողմ հանդիպումը, շոշափվել է ձեռք բերված պայմանավորվածություններին համապատասխան գործնական և արդյունավետ աշխատանք տանելու կարևորությունը։

Իլհամ Ալիևը շնորհակալություն է հայտնել Եվրոպական խորհրդի ղեկավարին Հայաստանի և Ադրբեջանի միջև հարաբերությունների կարգավորմանն ուղղված աջակցության համար, ներառյալ սահմանների սահմանազատումը և սահմանագծումը, երկու երկրների միջև խաղաղության պայմանագրի նախապատրաստումը, տրանսպորտային և հաղորդակցության գծերի բացումը, ինչպես նաև այս խնդիրների նկատմամբ մշտական ​​ուշադրության համար։

Երկրի ղեկավարն ընդգծել է, որ բրյուսելյան հանդիպման արդյունքներով ադրբեջանական կողմը որոշել է հայ-ադրբեջանական սահմանի սահմանազատման և սահմանագծման ազգային հանձնաժողովի և երկու երկրների միջև խաղաղության պայմանագրի նախապատրաստման պատվիրակության կազմը և պատրաստ է Հայաստանի հետ Բաքու-Երևան ձևաչափով բանակցություններին։

Ադրբեջանի նախագահը նաև կարևորել է խաղաղության պայմանագրի շուրջ բանակցությունների համար Բաքվի առաջարկած հինգ սկզբունքների ընդունումը։

Իր հերթին Շառլ Միշելը նշել է, որ շարունակելու է ջանքեր գործադրել Հայաստանի և Ադրբեջանի միջև հարաբերությունների կարգավորման, ինչպես նաև տարածաշրջանում կայուն խաղաղության ապահովման ուղղությամբ։

Զրույցի ընթացքում ընդգծվել է Եվրամիության մտադրությունը՝ աջակցելու Ադրբեջանին՝ տարածքներն ականներից մաքրելու, Ղարաբաղյան առաջին պատերազմից ի վեր անհայտ կորած համարվող շուրջ 4000 ադրբեջանցիների (Բաքվի տվյալներով - խմբ.) ճակատագիրը որոշելու համար։

Կողմերը մտքեր են փոխանակել նաև Ադրբեջանի և Եվրամիության միջև համագործակցության հեռանկարների և փոխադարձ հետաքրքրություն ներկայացնող այլ հարցերի շուրջ»,- ասված է ադրբեջանական կողմի տարածած հայտարարությունում։