ԿԲ նախագահը համաձայն չէ Վահան Քերոբյանի հետ և մտադիր չէ արժեզրկել դրամը

Շփումներն ամերիկյան գործընկերների հետ խոսում է մեր նկատմամբ նրանց վստահության շատ բարձր մակարդակի մասին: Այս մասին, այսօր՝ հունիսի 14-ին, Կենտրոնական բանկում հրավիրված մամուլի ասուլիսի ժամանակ հայտարարեց ԿԲ նախագահ Մարտին Գալստյանը՝ պատասխանելով հարցին, թե արդյո՞ք ԱՄՆ-ն չի վստահում Հայաստանին և կանխիկով դոլար չի տալիս, որպեսզի այն չփոխանցվի ՌԴ-ին:

Ըստ նրա՝ խոսքը կանխիկ դոլարի շրջանառության մասին է, և ԱՄՆ-ը գտնում են, որ այս պահին պետք է այն սահմանափակվի ոչ միայն Հայաստանում, այլ ողջ աշխարհում և ՀՀ-ն, փոխկապակցված այլ երկրների նման, այդ վերաբերմունքին է արժանանում:

Մարտին Գալստյանը հայտնեց, որ դոլարի կանխիկ և ոչ կանխիկ փոխարժեքների տարբերությունը պայմանավորված է ՌԴ շուկայով, որն ազդում է նաև ՀՀ ֆինանսական սեկտորի վրա:

Հարցին, թե ԿԲ նախագահը ինչպես է վերաբերվում էկոնոմիկայի Նախարար Վահան Քերոբյանի հայտարարությանը, ըստ որի՝ ԿԲ-ն կարող է միջամտել և կանգնեցնել դրամի արժևորման գործընթացը՝ Գալստյանը պատասխանեց. «Ես չեմ լսել Էկոնոմիկայի նախարարի ելույթը, բայց եթե դա է եղել լեյկմոտիվը, որ պետք է արժեզրկվի դրամը, որպեսզի արտահանողներին օգնեն, ապա արժեզրկելու միակ ձևը՝ ԿԲ-ի ինտերվենցիաներն են արտարժույթի շուկա, դոլարի առքի ուղղությամբ, որը պետք է հանգեցնի դոլարի գնի բարձրացմանը և հայկական դրամի գնի նվազեցման:

Եթե մենք մասսամբ դավաճանենք մեր որդեգրած քաղաքականությանը, ավելին՝ արժեզրկենք հայկական դրամը՝ ունենալու ենք գնաճի նոր զարգացումներ, որոնք չեմ կարծում, որ բխում են ՀՀ քաղաքացիների շահերից»:

Մարտին Գալստյանը չհամաձայնեց նաև լրագրողի կարծիքի հետ, որ դոլարի արժեզրկման և այն գնելու միջոցով ավելացվում է ՀՀ արտաքին պահուստները՝ հայտնելով, որ 2022 թ-ին ԿԲ-ն շուկայից գնել է ընդամենը 100 միլիոն դոլարից մի փոքր ավել գումար:

«2022 թ մարտի վերջի դրությամբ ՀՀ համախառն պահուստները կազմել են 2 մլրդ 940 մլն դոլար, ապրիլի վերջի դրությամբ՝  3 մլրդ 68 մլն դոլար և մայիսի վերջի դրությամբ՝ 3 մլրդ 151 մլն դոլար»,-հայտնեց ԿԲ մակրոտնտեսական դեպարտամենտի տնօրեն Արմեն Նուրբեկյանը:

Վերջինս նաև հայտարարեց, որ արտարժույթի շուկա ԿԲ-ն ինտերվենցիա է անում միայն ֆինանսական կայունություն ապահովելու, այլ ոչ թե փոխարժեքը կարգավորելու համար: