Սի Ծինփինը Ջո Բայդենին հայտնել է Չինաստանի սկզբունքային դիրքորոշումը Թայվանի հարցում

Չինաստանի նախագահ Սի Ծինփինը ԱՄՆ նախագահ Ջո Բայդենի հետ հուլիսի 28-ին կայացած հեռախոսազրույցի ընթացքում մանրամասն ներկայացրել է Թայվանի հարցում Չինաստանի սկզբունքային դիրքորոշումը, հայտնում է CGTN-ը։

Նա ընդգծել է, որ Թայվանի հարցի պատմական կողմերը պարզ են, ինչպես նաեւ փաստն ու ստատուս քվոն, որ Թայվանի նեղուցի երկու կողմերը պատկանում են նույն Չինաստանին։ Չին-ամերիկյան երեք համատեղ կոմյունիկեները մարմնավորում են երկու կողմերի ստանձնած քաղաքական պարտավորությունները, իսկ «Մեկ Չինաստան» սկզբունքը չին-ամերիկյան հարաբերությունների քաղաքական հիմքն է, նշում են չինական լրատվամիջոցները:

«Չինաստանը կտրականապես դեմ է Թայվանի անկախությանն ուղղված անջատողական քայլերին եւ արտաքին ուժերի միջամտությանը եւ երբեք տարածք չի թողնի Թայվանի անկախության ուժերին: Չինաստանի կառավարության եւ ժողովրդի դիրքորոշումը Թայվանի հարցում հետեւողական է, եւ Չինաստանի ազգային ինքնիշխանության ու տարածքային ամբողջականության վճռականությունը պաշտպանելն ավելի քան 1,4 միլիարդ չինացի ժողովրդի վճռական կամքն է»,- ասվում է երկու երկրների ղեկավարների հեռախոսազրույցի արդյունքներով չինական կողմի հայտարարության մեջ։

Ծինփինը նաեւ ընդգծել է, որ Չինաստանի եւ ԱՄՆ-ի հարաբերությունները ռազմավարական մրցակցության տեսանկյունից սահմանելը եւ Չինաստանը որպես գլխավոր մրցակից եւ ամենալուրջ երկարաժամկետ մարտահրավեր դիտելը նշանակում է սխալ ընկալել Չինաստանի եւ ԱՄՆ-ի հարաբերությունները եւ սխալ գնահատել Չինաստանի զարգացումը, ինչպես նաեւ մոլորության մեջ գցել երկու երկրների ժողովուրդներին եւ միջազգային հանրությանը:

Չինաստանի ղեկավարի խոսքով՝ մատակարարման շղթաները կտրելու կամ խզելու փորձերը՝ խախտելով հիմնարար օրենքները, չեն օգնի բարձրացնել ԱՄՆ-ի տնտեսությունը: Դրանք միայն ավելի խոցելի կդարձնեն համաշխարհային տնտեսությունը։ Երկու կողմերն էլ պետք է աշխատեն տարածաշրջանային թեժ կետերի դեէսկալացիայի ուղղությամբ, օգնեն աշխարհը որքան հնարավոր է շուտ ազատել COVID-19-ից, նվազեցնել ստագֆլյացիայի եւ ռեցեսիայի վտանգը եւ աջակցել միջազգային համակարգին, որի կենտրոնում ՄԱԿ-ն է եւ միջազգային իրավունքի վրա հիմնված միջազգային կարգը։