Հայաստանի նկատմամբ արտաքին ագրեսիա չի եղել, Երևանը դեռևս չի հայտարարել ՀԱՊԿ-ից դուրս գալու մասին․ Պուտին

ՌԴ նախագահ Վլադիմիր Պուտինը մեկնաբանել է Աստանայում ՀԱՊԿ հանդիպմանը Հայաստանի բացակայությունը, հայտնում է «ՌԻԱ Նովոստին»։

«Յուրաքանչյուր երկիր իրավունք ունի ընտրելու, թե ինչ և ինչպես է ուզում անել իր անվտանգությունն ապահովելու համար։ Կարծում եմ, որ Հայաստանի և ՀԱՊԿ-ի միջև առկա իրավիճակը, ամենայն հավանականությամբ, թելադրված է հենց Հայաստանի ներքաղաքական գործընթացներով», - ասել է Պուտինը՝ մեկնաբանելով Հայաստանի բացակայությունը Աստանայում ՀԱՊԿ հանդիպմանը։

Նա նշել է, որ Հայաստանը չի հայտարարել ՀԱՊԿ-ից դուրս գալու ցանկության մասին, կա հավանականություն, որ Երևանը վերադառնա ՀԱՊԿ-ում լիարժեք աշխատանքին։

«Հայաստանը չի հայտարարել (ՀԱՊԿ-ից - խմբ.) դուրս գալու մասին, համենայնդեպս, դեռ։ Նա հայտարարել, որ դադար է վերցնում, բայց միևնույն ժամանակ աջակցում է բոլոր փաստաթղթերին, որոնք ընդունվում են մեր այսօրվա հանդիպման ժամանակ։ Եթե ​​դա այդպես է, նշանակում է հավանականություն կա, որ Հայաստանը կվերադառնա լիարժեք աշխատանքին այս ասոցիացիայի շրջանակներում»,- լրագրողներին ասել է Պուտինը։ 

Լեռնային Ղարաբաղի հետ կապված իրադարձությունները ոչ մի կապ չեն ունեցել ՀԱՊԿ-ի հետ, Հայաստանի դեմ ագրեսիա չի եղել, ասել է ՌԴ նախագահը։

«Հայաստանի դեմ որևէ ագրեսիա չի եղել։ ՀԱՊԿ-ն կոչված է անդամ երկրներին արտաքին ագրեսիայից պաշտպանելու համար։ Լեռնային Ղարաբաղի հետ կապված իրադարձություններն ունեն իրենց առանձնահատկությունները, քանի որ Հայաստանը չի ճանաչել Ղարաբաղը որպես անկախ պետություն և, իհարկե, Ղարաբաղը չի ներառել իր պետական ​​պարագծում։ Սա նշանակում է, որ այն ամենն, ինչ տեղի է ունեցել Ղարաբաղում, իրավական տեսակետից Հայաստանի հետ անմիջական առնչություն չունի»,– նշել է նա։