Որքանո՞վ է ազդում ուկրաինական պատերազմը ՀՀ տնտեսության վրա․ տնտեսագետը ռիսկեր է տեսնում

Մինչ Ուկրաինայում ի մի են բերում, թե պատերազմի մեկնարկից ի վեր որքան է կազմել Արևմուտքի օգնությունը (18 մլրդ ԱՄՆ դոլար), նաև խոստովանում, որ այդ ահռելի աջակցության պայմաններում անգամ Կիևին չի հաջողվում փակել ամսական 5 մլն ԱՄՆ դոլարի դեֆիցիտը, Վրաստանի վարչապետ Իրակլի Ղարիբաշվիլին հայտարարեց, որ Ուկրաինայի հարցով ճիշտ դիրքորոշման շնորհիվ երկրում կարողացել են ապահովել տնտեսական երկնիշ աճ։ Իսկ ինչպիսի՞ն է ուկրաինական պատերազմի ազդեցությունը ՀՀ տնտեսության վրա։

«Ռուս-ուկրաինական հակամարտության և Ռուսաստանի հանդեպ կիրառվող պատժամիջոցների ազդեցությամբ պայմանավորված արտաքին պահանջարկի կտրուկ աճի և տրանսֆերտների հոսքերի կտրուկ ավելացման պայմաններում Հայաստանի տնտեսությունում բարձր  տնտեսական ակտիվություն է նկատվում արդեն մարտ ամսից, իսկ մայիս ամսից արդեն երկնիշ աճ է գրանցվել: Վերջին տվյալներով՝ 2022 թվականի օգոստոսի դրությամբ տնտեսական ակտիվության ցուցանիշը  կազմել է 11.3 տոկոս»,-այս մասին ԼՈՒՐԵՐ․com-ի հետ զրույցում ասաց տնտեսագետ, կառավարման փորձագետ Կարեն Սարգսյանը։

Մեր այն հարցին, երբ աշխարհն առավելապես զբաղված է Ուկրաինայի հիմնահարցով, որքանո՞վ է Հայաստանը գրավիչ միջազգային տնտեսական գործընկերների համար՝ նաև ՌԴ ռազմավարական դաշնակցի կարգավիճակում, մեր զրուցակիցը նշեց, որ համաշխարհային  տնտեսությունը ներկայումս հայտնվել է բավական բարդ իրավիճակում և հավանական է ռեցեսիայի առաջացումը՝ պայմանավորված ֆինանսական քաղաքականության կտրուկ կոշտացման հետ: 

«Դա պայմանավորված է հիմնականում բարձր գնաճային միջավայրի հետ, որը ձևավորվել էր դեռևս Քովիդի ժամանակաշրջանում և ավելի խորացել ռուս-ուկրաինական պատերազմի արդյունքում: Այս պայմաններում արտաքին տնտեսական հարաբերություններում թե երկրները և թե գործարարները զգուշավորություն են ցուցաբերում  ապագա անորոշությունների ֆոնին: Սա վերաբերվում է նաև Հայաստանին: Այսինքն, ներդրողները խուսափում են երկարաժամկետ ռիսկային ներդրումներ իրականացնել արտերկրում և իրենց կապիտալի համար ավելի անվտանգ ակտիվներ են նախընտրում՝ տվյալ դեպքում դա դոլարային ակտիվներն են»,-ընդգծեց Կարեն Սարգսյանը։

Ինչ վերաբերում է Հայաստանին որպես ՌԴ դաշնակից դիտարկելուն, ապա, տնտեսագետի կարծիքով, սա որևէ կերպ չի կաշկանդում Հայաստանի արտաքին տնտեսական քաղաքականության դիվերսիֆիկացիայի հարցում, պարզապես պետք է ավելի պրոակտիվ լինել այս հարցում:

Արա Ալոյան