Հակառուսական պատժամիջոցներից ամենաքիչը ՌԴ տնտեսությունն է տուժել․ Հայաստանը ևս շահեկան դիրքում է․ տնտեսագետ

Չնայած հիմնական առևտրատնտեսական գործընկեր Ռուսաստանի տնտեսությունից ՀՀ տնտեսության վրա սպասվող բացասական ազդեցությանը՝ տնտեսական ակտիվության ցուցանիշը տարվա առաջին կիսամյակում աճել է մոտ 12 տոկոսով։  Մասնագետների պնդմամբ, տնտեսության համար դրական «շոկ» են հանդիսացել կապիտալի և տուրիստական հոսքերը: 

Որքանո՞վ է հաջողվում պահպանել առաջանցիկ տեմպերը տարվա երկրորդ կիսամյակում, և որո՞նք են հիմնական միտումները։ ԼՈՒՐԵՐ․com-ի հարցին ի պատասխան, տնտեսագետ, կառավարման փորձագետ Կարեն Սարգսյանը նշեց․

«Առայժմ դեռ տնտեսական աճին նպաստող գործոնները, որոնք ածանցվում են ռուս-ուկրաինական պատերազմի կողմնակի ազդեցություններից, պահպանվում են։ Դա, նախ և առաջ, դեպի Հայաաստանի Հանրապետություն տրանսֆերտների աննախադեպ աճն է՝ հիմնականում Ռուսաստանի Դաշնությունից, ինչպես նաև  ՌԴ քաղաքացիների մեծ ներհոսքը։ Միայն 2022 թվականի ինն ամիսների տվյալներով՝ Ռուսաստանի Դաշնության անձնագրով Հայաստան է ժամանել շուրջ 780 հազար քաղաքացի, ելք են կատարել մոտ 740 հազար, այսինքն շուրջ 40 հազար ռուսաստանի քաղաքացիներ ներկայումս գտնվում են ՀՀ-ում և մեր տնտեսության համար լրացուցիչ առաջարկ են ձևավորում»։

Մեր զրուցակցի կարծիքով, վերոնշյալ գործոնների ազդեցությունը առաջիկա ամիսներին հավանական է, որ հիմնականում կպահպանվեն։ Ըստ նրա, ընթացիկ տարվա առաջին ութ ամիսների տվյալներով, տնտեսական աճի տեմպը կազմում է 13.9% և հաշվի առնելով վերոգրյալ գործոնների ազդեցությունը՝ կարծում եմ առաջիկա ամիսներին կպահպանվի  աճի տեմպը որոշակի  ճշգրտումներով։

Ի դեպ, հեղինակավոր The Economist-ը պնդում է, թե ՌԴ-ն շահել է Եվրոպայի հետ տնտեսական պատերազմը, իսկ Goldman Sachs բանկ-ի տվյալներով՝ Ռուսաստանում տնտեսական ներկայիս ակտիվությունը շատ ավելի բարձր է, քան եվրոպական խոշոր երկրներում։ Ի՞նչ կասեք այս իմաստով․

«Փաստացի, ՌԴ հանդեպ կիրառվող տնտեսական պատժամիջոցները հանգեցրել են մի իրավիճակի, երբ այդ պատժամիջոցները սահմանող պետությունների տնտեսություններն ավելի շատ են տուժում դրանից, քան Ռուսաստանի տնտեսությունը։ Միայն այն հանգամանքը, որ ՌԴ-ն հանդիսանում է ռազմավարական հիմնական ապրանքերի՝ էներգակիրների և հացահատիկի համաշխարհային խոշոր  մատակարար և փաստացի պատժամիջոցների արդյունքում այդ ապրանքերի գինը կտրուկ բարձրացել է, ինչն ավելի ձեռնտու է բնականաբար Ռուսաստանին և բացասաբար է ազդում արևմտյան երկրների վրա, սա տնտեսական աճի առկա տարբերությունների հիմնական պատճառն է։ Ավելին, Ռուսաստանը ռեսուրսներով ինքնաբավ երկիր է և այս առումով տնտեսապես ավելի քիչ խոցելի»,-ընդգծեց Կարեն Սարգսյանը։ 

Արա Ալոյան