Պուտինի և Էրդողանի «սրտանց» հարաբերությունները Արևմուտքի զայրույթն են առաջացնում․ Bloomberg

ԱՄՆ պաշտոնյաները բանակցություններ են վարել թուրք գործընկերների հետ՝ Ռուսաստանի դեմ ֆինանսական պատժամիջոցներ կիրառելու համար, ինչը Արեւմուտքի վերջին քայլն է, որպեսզի ստիպի Անկարային ավելի կոշտ դիրքորոշում ընդունել Մոսկվայի նկատմամբ:

Ֆինանսների նախարարի ահաբեկչության ֆինանսավորման եւ ֆինանսական հանցավորության դեմ պայքարի հարցերով օգնական Էլիզաբեթ Ռոզենբերգի գլխավորած պատվիրակությունը այս շաբաթվա սկզբին Անկարայում եւ Ստամբուլում հանդիպել է Թուրքիայի կենտրոնական բանկի ղեկավարի եւ գործարար խմբերի հետ, իսկ չորեքշաբթի օրը պետք է հանդիպեր ֆինանսների նախարարության տեղական պաշտոնյաների հետ:

Այցը տեղի է ունեցել Ղազախստանի մայրաքաղաքում Թուրքիայի նախագահ Ռեջեփ Թայիփ Էրդողանի եւ նրա ռուս գործընկեր Վլադիմիր Պուտինի բանակցություններից մեկ շաբաթ անց: Երկու ղեկավարները պայմանավորվել են ամրապնդել էներգետիկ կապերը եւ ստեղծել միջազգային գազային հանգույց Թուրքիայում, ինչը երկիրը պոտենցիալ կդարձնի դեպի Եվրոպա ռուսական հոսքերի առանցքային ուղի:

Ռուսաստանի հետ Թուրքիայի տնտեսական եւ առեւտրային կապերի խորացումը, որը ամրապնդված է Էրդողանի եւ Պուտինի ջերմ հարաբերություններով, առաջացրել է Արեւմուտքի զայրույթը, որը ցանկանում է միացյալ միջազգային ճակատ ստեղծել, որպեսզի համոզի Մոսկվային փոխել կուրսը Ուկրաինայի հարցում»,- գրում է Bloomberg-ը։

ԱՄՆ ֆինանսների փոխնախարար Ուոլլի Ադեյեմոն հունիսին այցելել է Թուրքիա՝ արտերկրում ռուսական ակտիվների արգելափակմանը աջակցելու նախագահ Ջո Բայդենի վարչակազմի ջանքերի շրջանակներում: Ավելի ուշ Ադեյեմոն նամակ է ուղարկել մի քանի թուրքական բիզնես խմբերին՝ նախազգուշացնելով նրանց Ռուսաստանում բիզնես վարելու հետեւանքների մասին։

Սեպտեմբերին Ֆինանսների նախարարության արտաքին ակտիվների վերահսկողության վարչությունը նախազգուշացրել է ֆինանսական հաստատություններին ռուսական վճարային քարտերի «Միր» օպերատորի հետ նոր պայմանագրերի կնքման կամ գործող պայմանագրերի ընդլայնման ռիսկերի մասին: Դա անհանգստացրել է թուրք պաշտոնյաներին, եւ համակարգում ներգրավված բոլոր հինգ թուրքական բանկերը հետագայում հրաժարվել են դրանից:

«Թուրքիան դառնում է ավելի ու ավելի կարեւոր գործընկեր Պուտինի համար, քանի որ պատժամիջոցները փակում են առեւտրի, ճանապարհորդությունների եւ ներդրումների մյուս ուղիները: Իսկ Էրդողանը, որը կառաջադրվի հաջորդ տարվա ընտրություններում նոր ժամկետի համար, հուսով է, որ Ռուսաստանը կօգնի աջակցել Թուրքիայի խնդրահարույց տնտեսությանը, որը ներառում է արտոնյալ գազ ապահովումը եւ լիրայով վճարումների մասին համաձայնագիրը»,- նշում է գործակալությունը: