Տղամարդն օգնել է սիրուհուն սպանել ամուսնուն և բեմադրել իր առևանգումը

Հնդկաստանի բնակիչն օգնել է իր սիրուհուն սպանել ամուսնուն և որոշել է բեմադրել սեփական առևանգումը, որպեսզի շփոթեցնի հետաքննությանը, հայտնում է Indian Express-ը։

Սեպտեմբերի 19-ին Քամալկանտ անունով տղամարդը մահացել է ներքին օրգանների աշխատանքի հետ կապված խնդիրներից։ Որոշ ժամանակ նա բողոքում էր որովայնի ցավերից։ Բուժման ընթացքում պարզվել էր, որ նրա արյան մեջ մկնդեղի եւ թալիումի բարձր պարունակություն կա։ Տղամարդու մահը հատկապես կասկածելի էր թվացել հնդիկ ընտանիքին, քանի որ նրա մայրը՝ Շարլադևին, մահացել էր օգոստոսի 13-ին՝ նմանատիպ ախտանիշներով։ Հոկտեմբերին գործը փոխանցվել էր ոստիկանության քրեական բաժանմունք։ Քննիչները կարծում են, որ Քամալկանտի կինը՝ Կավիտա Շահը, և նրա սիրեկանը՝ Հիտեշ Ջայնը, նրա սննդի մեջ թույն են խառնել։

Ավելի ուշ Ջայնը, ում ոստիկանությունը կանչել էր հարցաքննության, վախեցել է բացահայտվելուց և փորձել է շփոթեցնել քննիչներին՝ կեղծելով իր առևանգումը։ Նա հանկարծակի անհետացել է և ընկերոջը ձայնային հաղորդագրություն է ուղարկել, որում հայտնել է, որ անհայտ անձինք առևանգել են իրեն, ծեծել և դուրս շպրտել Նասիկ տանող մայրուղու վրա։

«Ձայնային հաղորդագրության մեջ Ջայնը հայտարարել է, որ իր մեքենան վնասվել է»,- հայտնել են ոստիկանությունից։ Ջայնի ընկերը և նրա հարազատները դեպքի մասին հայտնել են ոստիկանություն, որի աշխատակիցներին հաջողվել է պարզել, որ առևանգված տղամարդը գտնվում է Շահապուր քաղաքի մոտ։

Ջայնը հոսպիտալացվել է։ Նա վնասվածքներ է ունեցել ամբողջ մարմնի վրա։ Մինչ Մումբայի ոստիկանությունը մասնագետների խումբ էր ուղարկում այնտեղ, Շահապուրի ոստիկանությունն արդեն հարցաքննում էր նրան հիվանդանոցում։ Հոկտեմբերի 26-ի վաղ առավոտյան ճանապարհային ոստիկանները Նասիկ տանող մայրուղու վրա հայտնաբերել են նրա մեքենան՝ շրջված վիճակում։ Ջայնը ոստիկաններին ասել է, որ պատրաստվում էր հանդիպել ինչ-որ մեկի հետ, և նրա վրա հարձակվել էին երկու հոգի։

«Նրա հայտարարությունները անտրամաբանական էին, և դրանք չհետաքննեցինք։ Նա իրեն նյարդային էր պահում։ Հարցաքննության ժամանակ նա անընդհատ փոխում էր ցուցմունքը։ Մենք պարզել ենք, որ նա ինքն է իրեն վնասվածքներ պատճառել»,- ասել է Մահարաշտրա նահանգի Շահապուր քաղաքի ոստիկանության ներկայացուցիչը:

Բեմադրելով իր առևանգումը՝ տղամարդը փորձել է ոստիկանությանը տանել կեղծ հետքի վրա և ուշադրությունը շեղել Քամալկանտի սպանության հետաքննությունից։ Ոստիկանությունը ձերբակալել է Ջայնին և նրա սիրելիին։ Իրավապահ մարմինները հետաքննում են Կավիտայի և Ջայնի դերը Քամալկանտի մոր մահվան մեջ։