Ուզբեկստանը մերժել է Պուտինին

Ուզբեկստանը մտադիր է գազ ներկրել իր հարևաններից կոմերցիոն, այլ ոչ թե «ինչ-որ դաշինքի կամ միության» պայմանագրով։ Այս մասին այսօր՝ դեկտեմբերի 8-ին, հայտարարել է Ուզբեկստանի էներգետիկայի նախարար Ժուրաբեկ Միրզամախմուդովը, հայտնում է gazeta.uz-ը։ Այսպիսով, գերատեսչության ղեկավարը մեկնաբանել է այն խոսակցությունները, թե Ուզբեկստանում էներգառեսուրսների արհեստական ​​դեֆիցիտ է ստեղծվում, որպեսզի երկիրը համոզվի կամավոր մասնակցել Ռուսաստանի և Ղազախստանի հետ «եռակողմ գազային միության» պայմանագրին։

«Պետք է նշել, որ էներգետիկ ռեսուրսների պակասը կապված չէ արտաքին գործոնների հետ։ Դա պայմանավորված է ներքին սպառման աճով, տնտեսության աճով, բնակչության աճով և մարդկանց բարեկեցությամբ ու եկամուտներով, ինչի պատճառով՝ էներգառեսուրսների կարիքն ու պահանջարկը կտրուկ աճում է։ Պետք է նշել, որ մենք մեղավոր ենք, որ չենք կարողանում բավարար մակարդակով և ծավալներով ծածկել այդ կարիքը»,- ասել է Միրզամախմուդովը։
Նրա խոսքով, երկիրը ստիպված է գազ ներկրել։

«Պահանջարկը ծածկելու, ներքին սպառումն ապահովելու և խնդիրը լուծելու համար մենք այսօր բանակցություններ ենք վարում հարևան երկրներից գազ և էլեկտրաէներգիա ներկրելու շուրջ, այլ ոչ թե ինչ-որ դաշինքի կամ միության միջոցով։ Այստեղ մենք բանակցում ենք՝ ազգային շահերից ելնելով, որպեսզի համագործակցենք կոմերցիոն պայմանագրի, առքուվաճառքի, այլ ոչ թե մեր էներգետիկ ցանցերի փոխանցման միջոցով»,- ընդգծել է նա։