Ֆրանսիայում ցանկանում են, որ ՖԻՖԱ-ն հետաքննի Մբապեի հասցեին արգենտինացիների վիրավորանքները

Ֆրանսիայի նախարարների կաբինետի անդամը պահանջում է Ֆուտբոլի միջազգային ֆեդերացիայից (ՖԻՖԱ) հետաքննություն անցկացնել՝ արգենտինացի երկրպագուների կողմից ազգային հավաքականի հարձակվող Կիլիան Մբապեի հասցեին վիրավորանքների հետ կապված: Այս մասին հայտնում է CBC-ը։

Հիշեցնենք, որ աշխարհի առաջնությունում հաղթանակը տոնելու ժամանակ արգենտինացի երկրպագուները հրկիզել էին դագաղի կափարիչ, որի վրա պատկերված էր Մբապեն։

Կտրուկ հայտարարություններ է արել նաև Արգենտինայի հավաքականի դարպասապահ Էմիլիանո Մարտինեսը։ Աշխարհի առաջնության եզրափակիչից հետո մրցանակաբաշխության ժամանակ նա անպարկեշտ ժեստ էր ցույց տվել։ Իսկ աշխարհի առաջնության նախաշեմին նա պատասխանել էր Լատինական Ամերիկայի հավաքականի մասին Մբապեի խոսքերին՝ ասելով, որ ֆրանսիացին ֆուտբոլից բան չի հասկանում։

Հանդերձարանում հաղթանակի տոնակատարության ժամանակ Մարտինեսը մեկ րոպե լռություն էր կազմակերպել ի պատիվ Մբապեի, իսկ տուն հասնելուն պես երկրպագուներից ստացել էր Մբապեի դեմքի պատկերով տիկնիկ, որը նա ձեռքերում պահել էր երկրպագուների հետ հանդիպման ժամանակ։