6 գործոն, որոնք կվճռեն ձմռանն Ուկրաինայում պատերազմի ընթացքը. The Wall Street Journal

Ուկրաինայում այս ձմռանը ռազմական գործողությունների ընթացքը որոշվելու է մի շարք գործոններով։ Դրանցից են եղանակը, իրավիճակը Բախմուտում, ռուսական հարձակումը, իրադարձությունները Ուկրաինայի սահմաններից դուրս։ Միևնույն ժամանակ, խաղաղության բանակցություններն առայժմ հեռու են թվում: Այս մասին գրում է ամերիկյան The Wall Street Journal թերթը։

Պարբերականը առանձնացնում է վեց գործոն, որոնք կարող են որոշել պատերազմի ընթացքը.

1. Եղանակը

Հրատարակության տվյալներով՝ Ուկրաինայում դեռևս ցեխ է, և նույնիսկ տանկերը դժվարությամբ են շարժվում։ Հակամարտությունը կարող է սրվել, երբ հողը կարծրանա։ Եվ, չնայած սառնամանիքները կարող են օգուտ բերել Ուկրաինայի զինված ուժերին առաջնագծում, այն շատ ավելի դժվար կլինի թիկունքում գտնվող ուկրաինացիների համար՝ հաշվի առնելով էներգիայի հետ կապված խնդիրները:

2. Իրավիճակը Բախմուտում

Հրատարակությունը գրում է նաև, որ Բախմուտը գրավելու ռուսական փորձերը «հոգեբանական նշանակություն» են ձեռք բերել։ Կորուստը թույլ կտար ուկրաինական ուժերին նահանջել ավելի բարձր և ապահով դիրքեր, բայց քարոզչական տեսանկյունից դա կմեկնաբանվեր՝ որպես Մոսկվայի հաղթանակ։

3. Ուկրաինական հարձակումները

Ռազմական վերլուծաբանների մեծ մասը կարծում է, որ Ուկրաինան պահպանում է պատերազմի ռազմավարական նախաձեռնության մեծ մասը աշնանը Ռուսաստանի վերահսկողության տակ գտնվող տարածքների զգալի հատվածը վերականգնելուց հետո: Նրանք կարծում են, որ Ուկրաինան կցանկանա շարունակել հարձակումը ձմռանը և, հնարավորության դեպքում, էլ ավելի հետ մղել ռուսական զորքերը։

4. Ռուսական պաշտպանությունը

Ռուսաստանի համար աշնանը գրավված տարածքները կորցնելու առավելություններից մեկն այն է, որ այժմ նա պետք է պաշտպանի ռազմաճակատի շատ ավելի կարճ հատվածը։ Ուկրաինական հաշվարկներով՝ ճակատը մոտ 1100 կմ-ից կրճատվել է մոտ 885 կմ-ի, որից մոտ 386 կմ-ը գետային արգելապատնեշներ են։ Իսկ Ուկրաինայի հարձակման հավանական ուղղությունները ակնհայտ են նաև ռուսների համար։

«Ռուսաստանի ներկայիս նպատակը, բացառությամբ Բախմուտի և մի քանի այլ ոլորտների, չպարտվելն է», - նշում են ռազմական վերլուծաբանները հրապարակման մեջ:

Լոնդոնի «Քինգս» քոլեջի պաշտպանական ուսումնասիրությունների հրավիրյալ պրոֆեսոր Մայքլ Քլարկն ասում է, որ Ռուսաստանը կարծես թե «հուսով է, որ ինչ-որ բան տեղի կունենա», ինչպես օրինակ՝ ցուրտ ձմռանը Ուկրաինային արևմուտքի աջակցության նվազումը կամ հանրապետականների ազդեցության աճին զուգընթաց ԱՄՆ-ի աջակցության նվազումը:

5. Ռուսաստանի հարձակումը

Պարբերականը հիշեցնում է, որ վերջերս ուկրաինացի բարձրաստիճան պաշտոնյաները հայտարարել էին, որ Ռուսաստանը հաջորդ տարվա սկզբին պատրաստվում է նոր մեծ հարձակման Ուկրաինայում։ Նրանց կարծիքով, դա կարող է ներառել նոր հարձակում Բելառուսի տարածքից Կիևի ուղղությամբ։

Արևմտյան վերլուծաբանները թերահավատ են, որ ռուս պահեստազորները կկարողանան հասնել նրան, ինչ ավելի մարտունակ և պատրաստված զորքերը չկարողացան անել այս տարվա սկզբին: Ռազմական վերլուծաբանները կարծում են, որ Ռուսաստանի Դաշնության կողմից հնարավոր նոր հարձակման մասին նախազգուշացումները կարող են ուղղված լինել, առաջին հերթին, չեզոքացնելու ռուս զինվորականների կողմից մինչ այժմ դրսևորած անգործունակության մասին ինքնագոհությունը, և երկրորդը, ճնշում գործադրել Ուկրաինայի արևմտյան գործընկերների վրա, որպեսզի նրանք շարունակեն մատակարարումները Կիևին զենքով և զինամթերքով, ասվում է հոդվածում։

6. Իրադարձությունները Ուկրաինայից դուրս

Եթե ​​Պուտինը հույս ունի, որ Արևմուտքի աջակցությունը կթուլանա, դա դեռ տեղի չի ունեցել: Այս ամիս Ուկրաինայի նախագահ Վոլոդիմիր Զելենսկու այցը Վաշինգտոն ցույց է տալիս ԱՄՆ-ի շարունակական աջակցությունն Ուկրաինային: Մինչ այժմ եվրոպական կառավարությունների աջակցությունը կարծես շարունակվում է։

Բացի այդ, հրատարակությունը նշում է, որ որոշ արևմտյան (և ոչ միայն) առաջնորդներ կշարունակեն խոսել խաղաղության հաստատման պայմանների մասին։ Սակայն խաղաղության բանակցությունները հեռու են թվում, քանի որ Ուկրաինայի նախագահ Վոլոդիմիր Զելենսկին ասում է, որ Ուկրաինայի նպատակն է վերադարձնել 2014 թվականից ի վեր կորցրած բոլոր տարածքները:

Այսօր արդեն Ուկրաինայում պատերազմի 307-րդ օրն է։