Բայդենը ստորագրել է 1,7 տրիլիոն դոլարի չափով ԱՄՆ բյուջեն

ԱՄՆ նախագահ Ջո Բայդենը հաստատել է երկրի բյուջեն 2023 ֆինանսական տարվա համար (սկսված 2022 թվականի հոկտեմբերի 1-ից)՝ մոտ 1,7 տրիլիոն դոլար։ Այն նախատեսում է 44,9 միլիարդ դոլարի հատկացում՝ Կիևին և ՆԱՏՕ-ի ամերիկյան դաշնակիցներին աջակցելու համար, գրում են միջազգային ԶԼՄ-ները։

«Նախագահը ստորագրել է 2023 թվականի Համախմբված հատկացումների մասին օրենքը, որը նախատեսում է համախմբված հատկացումներ 2023 թվականի սեպտեմբերի 30-ին ավարտվող ֆինանսական տարվա համար, ինչպես նաև շտապ օգնություն Ուկրաինային և նպատակների համար», - ասվում է Սպիտակ տան հայտարարության մեջ։

Նշվում է, որ բյուջետային միջոցների մեծ մասը (858 մլրդ դոլար) ուղղվելու է ԱՄՆ պաշտպանության ֆինանսավորմանը, ինչը գրեթե 10%-ով ավելի է ռազմական ոլորտի վերջին ծախսերից (մոտ 782 մլրդ դոլար)։

Բացի այդ, 772,5 մլրդ դոլարի չափով ծախսեր են նախատեսված ներքին ոչ պաշտպանական ծրագրերի համար, ինչպես նաև 40 մլրդ դոլար կուղղվի բնական աղետների դեմ պայքարին։