Ռոտերդամի քաղաքապետը հայտնվել է սկանդալի կենտրոնում՝ Ադրբեջանի դեսպանի հետ հանդիպման պատճառով

Նիդերլանդների հայկական կազմակերպությունների ֆեդերացիան հայտնում է, որ Ռոտերդամի քաղաքապետի հանդիպումը հայատյաց, ռասիստական ​​հայտարարություններով հայտնի ադրբեջանցի դեսպանի հետ լուրջ դժգոհություն է առաջացրել Ռոտերդամի քաղաքային խորհրդի անդամների մոտ, ինչը գրավել է նաև լրատվամիջոցների ուշադրությունը։

Քաղաքային խորհրդի անդամ Ռոբերտ Յան վան դե Վերկեն Twitter-ի իր էջում կտրուկ քննադատել է քաղաքապետ Ահմեդ Աբութալեբին՝ Հայաստանի դեմ Ադրբեջանի ագրեսիայի և նրա տարածքի օկուպացիայի, Լաչինի միջանցքի շրջափակման, հայկական մշակութային ու կրոնական ժառանգության կանխամտածված ոչնչացման, հայերի նկատմամբ ատելության քարոզչության ֆոնին Ադրբեջանի դեսպանի հետ հանդիպման համար։ 

Ռոտերդամի քաղաքային խորհրդի անդամն անդրադարձել է Նիդերլանդների պաշտոնական դիրքորոշմանը Հայաստանի տարածքների օկուպացիայի, Ադրբեջանի ռազմական հանցագործությունների վերաբերյալ և հարցրել՝ արդյոք Ադրբեջանի դեսպանի հետ հանդիպումը ցույց է տալիս, որ Ռոտերդամի քաղաքապետն առանձին արտաքին քաղաքականություն է վարում։

Ավագանու պատգամավորը գրավոր հարցեր է ուղարկել քաղաքապետին՝ պարզաբանումներ պահանջելով հանդիպման նպատակահարմարության և բովանդակության վերաբերյալ։