«Լաչինի միջանցքի վերաբերյալ ՄԱԿ ԱԽ-ի հայտարարությունը չի ընդունվել Ֆրանսիայի մոտեցման պատճառով»․ ՄԱԿ-ում ՌԴ մշտական ​​ներկայացուցչի առաջին տեղակալ

«Լաչինի միջանցքի վերաբերյալ ՄԱԿ-ի Անվտանգության խորհրդի հայտարարությունը չընդունվեց Ֆրանսիայի անբարեխիղճ գործողությունների պատճառով, որը պատրաստել էր այն, և ոչ թե Ռուսաստանի դիրքորոշման պատճառով, ինչպես փորձում են պնդել Telegram-ի որոշ ալիքների հեղինակներ»։ Այս մասին շաբաթ օրը Telegram ալիքում հայտնել է ՄԱԿ-ում ՌԴ մշտական ​​ներկայացուցչի առաջին տեղակալ Դմիտրի Պոլյանսկին։

«Չեմ կարող չնշել մի շարք հայկական Telegram ալիքների կողմից տարածված Լաչինի միջանցքի շուրջ ստեղծված իրավիճակի վերաբերյալ ՄԱԿ-ի Անվտանգության խորհրդի կողմից մամուլի համար հայտարարություն չընդունելու պատճառների մասին տեղեկության բացարձակապես կեղծ ներկայացումը»,- ասել է նա,- «Երեւանի խնդրանքով, այս գործընթացը համակարգել են ֆրանսիացիները, որոնք անտեսել են մեր առաջարկների ճնշող մեծամասնությունը՝ միևնույն ժամանակ հաշվի առնելով Անվտանգության խորհրդի մյուս անդամների ուղղումները։ Փարիզում նման մեթոդների փնթիությունն ակնհայտ է»։

Պոլյանսկին նշել է, որ ռուս խաղաղապահները «ոչ թե խոսքով, այլ գործով են զբաղված Լեռնային Ղարաբաղում հակամարտության կարգավորմամբ, այդ թվում՝ Լաչինի միջանցքի շուրջ»։

 «Անկախ ներկայիս սրացումից՝ ամենաբարձր մակարդակով չորս համատեղ հայտարարությունները, որոնց աջակցում են և՛ Բաքուն, և՛ Երևանը, մնում են կարգավորման հիմքը։ Հայտարարության վրա աշխատելիս մեր նախկին արևմտյան գործընկերները համարձակություն չգտան նշելու այս փաստաթղթերը և ռուս խաղաղապահների ջանքերը։ Արեւմուտքին ավելի շատ մտահոգում էր Անվտանգության խորհրդի ինչ-որ արդյունք ընդունելը, քան կոնֆլիկտային իրավիճակի լուծումը։ Մենք հաստատապես հավատում ենք, որ Խորհրդի հայտարարությունը պետք է օգնի գտնել փոխզիջում և վերսկսել խաղաղ գործընթացը՝ առանց որևէ կողմին պիտակավորելու»,- նշել է նա։

Դիվանագետը հույս է հայտնել, որ «հայ ընկերները թույլ չեն տա իրենց ներքաշել կեղտոտ աշխարհաքաղաքական խաղերի մեջ՝ հօգուտ նրանց, ովքեր չեն վարանում որևէ պատրվակ օգտագործել ԽՍՀՄ-ում միասին ապրած եղբայրական ժողովուրդներին գժտվեցնելու և նույնիսկ չնչին հակասություններն ու խնդիրներն ավելի թեժ ուռճացնելու համար»:

Հիշեցնենք, որ Բելգիայում և Լյուքսեմբուրգում Ադրբեջանի դեսպան Վագիֆ Սադիգովը շնորհակալություն էր հայտնել Ալբանիային, Ռուսաստանին, ԱՄԷ-ին և Մեծ Բրիտանիային՝ Լաչինի միջանցքի հարցով ՄԱԿ ԱԽ-ի հայտարարության ընդունումը տապալելու համար։