ԱՄՆ-ը Հարավային Կորեայի հետ համատեղ միջուկային զորավարժություններ չի քննարկում. Ջո Բայդենը հակասել է Յուն Սոկ Յոլի խոսքերին

Միացյալ Նահանգները և Հարավային Կորեան այս պահին չեն քննարկում համատեղ զորավարժություններին ամերիկյան միջուկային ուժերի ներգրավման հարցը։ Այս մասին հաղորդում Է Reuters գործակալությունը:

Այսպիսով, Ջո Բայդենի խոսքերը հակասել են Հարավային Կորեայի նախագահ Յուն Սոկ Յոլի խոսքերին, ով հայտնել էր, թե Վաշինգտոնը բանակցություններ է վարում ԱՄՆ միջուկային ուժերի մասնակցությամբ համատեղ զորավարժություններ անցկացնելու շուրջ: Բայդենին հարցրել են՝ արդյոք ԱՄՆ-ն այժմ Հարավային Կորեայի հետ քննարկում Է համատեղ միջուկային զորավարժությունների անցկացման հնարավորությունը:

«Ո՛չ», - պատասխանել է Բայդենը լրագրողներին Սպիտակ տան մոտ, երբ նրան դիմավորել են Վիրջինյան կղզիներում արձակուրդից վերադառնալիս։

Ավելի վաղ Յուն Սոկ Յոլը Chosun Ilbo թերթին հարցազրույցում հայտնել էր, որ ԿԺԴՀ-ի «արդյունավետ ընդլայնված զսպումն ապահովելու» համար Վաշինգտոնը և Սեուլը բանակցություններ են վարում «միջուկային միջոցների բնագավառում համատեղ պլանավորման և համատեղ զորավարժությունների հայեցակարգի շուրջ, և ԱՄՆ-ը բավականին դրականորեն է տրամադրված դրան»:

«Միջուկային զենքերը պատկանում են Միացյալ Նահանգներին, սակայն պլանավորումը, տեղեկատվության փոխանակումը, զորավարժությունները և վարժանքները պետք է համատեղ իրականացվեն Հարավային Կորեայի և ԱՄՆ-ի կողմից», - նշել է Հարավային Կորեայի նախագահը:

Միևնույն ժամանակ Յուն Սոկ Յոլը հայտնել է, որ նման համագործակցությունը չի հանգեցնի միջուկային զենքի համատեղ կիրառման համաձայնագրի։ Ավելի վաղ երկու կողմերն էլ նշել էին, որ հակամարտության դեպքում ԱՄՆ-ը պատրաստ է ժամանակին «ռազմավարական միջոցներ» տեղակայել Կորեական թերակղզում, ինչը ենթադրում է ժամանակակից օդուժ, սուզանավեր և ավիակիր խմբեր։

Յուն Սոկ Յոլի այս հայտարարությանը նախորդել էր Հյուսիսային Կորեայի պետական գործակալության հայտարարությունը, որ Կիմ Չեն Ընը կոչ է արել մշակել նոր միջմայրցամաքային բալիստիկ հրթիռ և էապես ավելացնել երկրի միջուկային զինանոցը:

Բացի այդ, անցյալ շաբաթ Կիմ Չեն Ընը հայտարարել էր, որ Հարավային Կորեան, անկասկածելիորեն, դարձել է Հյուսիսային Կորեայի թշնամին, և հայտնել էր ռազմական նոր նպատակների մասին:

ԿԺԴՀ-ի վարած քաղաքականության առնչությամբ հունվարի 2-ի երեկոյան հայտարարություն է արել ԵՄ դիվանագիտության ղեկավար Ժոզեպ Բորելի խոսնակ Պիտեր Ստանոն:

«Եվրամիությունը ԿԺԴՀ-ին կոչ Է անում դադարեցնել ռազմական լարվածություն առաջացնող գործողությունները, այդ թվում՝ հրթիռների արձակումները և անօդաչու թռչող սարքերի արձակումները երկրի սահմաններից դուրս:ԵՄ-ն ԿԺԴՀ-ին կոչ է անում վստահելի քայլեր ձեռնարկել լիարժեք, ստուգման ենթակա և անշրջելի միջուկազերծման ուղղությամբ», - նշված է ԵՄ արտաքին գերատեսչության ղեկավարի խոսնակի տարածած հայտարարությունում:

Այս թեմայով Արարատ Միրզոյանը հանդիպում է ունեցել Ալժիրի ԱԳ նախարար Ահմեդ Ատտաֆի հետ. մանրամասներ Թուրքիան տարաձայնություններ ունի ԱՄՆ-ի հետ․ Էրդողան ԱՄՆ-ն կոչ է անում իր քաղաքացիներին անհապաղ լքել Լիբանանը Հայաստանի օպերայի պատմության մեջ նոր էջ է բացվում՝ աշխարհի ամենահեղինակավոր կառույցի հետ համագործակցությամբ ԱՄՆ-ի Փիթսբուրգ քաղաքը սեպտեմբերի 21-ը հայտարարել է «Հայաստանի ազգային օր»