Ներկայումս մանկատներում բնակվում է 602 երեխա․ Փաշինյանի գլխավորությամբ քննարկում է տեղի ունեցել

Վարչապետ Նիկոլ Փաշինյանի գլխավորությամբ այսօր շարունակվել է Աշխատանքի և սոցիալական հարցերի նախարարության 2022 թ. գործունեության հաշվետվության քննարկումը:

Խորհրդակցությանը մասնակցել են փոխվարչապետ Տիգրան Խաչատրյանը, վարչապետի աշխատակազմի ղեկավար Արայիկ Հարությունյանը, աշխատանքի և սոցիալական հարցերի նախարար Նարեկ Մկրտչյանը, պետական վերահսկողական ծառայության ղեկավար Ռոմանոս Պետրոսյանը, ֆինանսների նախարարի տեղակալ Վահան Սիրունյանը, վարչապետի աշխատակազմի պաշտոնյաներ, նախարարության ղեկավար կազմը, պաշտոնատար այլ անձինք:

Նախ ներկայացվել է անապահովության գնահատման համակարգի նոր բանաձևի ներդրման ուղղությամբ իրականացվող աշխատանքների ընթացքը: Նշվել է, որ այն լինելու է թվայնացված համակարգ՝ հաշվի առնելով միջազգային փորձը, միտված է լինելու hանրապետությունում ծայրահեղ աղքատության հաղթահարմանը: Այս համատեքստում, կարևորվել է նպաստառու քաղաքացիների վերաբերյալ թափանցիկ տեղեկատվություն ստանալու հնարավորությունների ընդլայնումը:

Հաջորդիվ անդրադարձ է կատարվել աղքատության հաղթահարման նպատակով իրականացվող ծրագրերի արդյունավետությանը: Զեկուցվել է, որ 298 ընտանիք նախորդ տարվա ընթացքում ներգրավվել է վերապատրաստման և բիզնես ծրագրերում:

Քննարկվել են սոցիալական բնակարանաշինության, սոցիալական փաթեթի ծրագրերի արդյունավետության բարձրացման, զբաղվածության բնագավառում ընթացիկ և առաջիկա աշխատանքները: Տեղեկացվել է, որ hանրապետությունում առկա է 144 սոցիալական կացարան, որից 21-ը ներկայումս թափուր է: Վերջիններիս շահառուներն են խոցելի խմբերի ներկայացուցիչները:

Վարչապետ Փաշինյանն անհրաժեշտ է համարել սոցիալական կացարանների շահառուների շրջանում ծրագրերն առավել ճկուն դարձնելը, որոնք մարդկանց կմղեն կարողությունների զարգացմանը:

Պատասխանատուները տեղեկացրել են, որ ներկայումս մանկատներում, ընդհանուր առմամբ, բնակվում է 602 երեխա, որից 510-ը՝ հաշմանդամություն ունեցող. 127 անձ ունի պոլիատիվ խնամքի կարիք, 209 անձի 18 տարին լրացած է, ևս 105 երեխա բնակվում է խնամատար ընտանիքներում: Նիկոլ Փաշինյանը հանձնարարել է հետևողականորեն շարունակել մանկատներում բնակվող երեխաների կրթության, կարողությունների զարգացման, խնամքի ծառայությունների որակի բարձրացման աշխատանքները: «Դրանց նպատակն է, որպեսզի մարդը մանկատնից դուրս գալիս ունենա որոշակի հմտություններ, բազային կրթություն, որպեսզի հետագայում ինքնուրույն կյանք վարելու հնարավորություն ունենա»,- ասել է վարչապետը: Պատասխանատուները նշել են, որ վերոնշյալ բոլոր 602 երեխաների կարիքներն անհատապես գնահատված են:

Անդրադարձ է կատարվել նաև ընտանեկան բռնության դեպքերի բացահայտման ուղղությամբ իրականացվող աշխատանքներին, թվայնացման միջոցով Միասնական սոցիալական ծառայությունների տարածքային կենտրոնների գործունեության բարելավմանը և այլ հարցերի: