Հրշեջ-փրկարարները մարել են Տավուշի մարզի «Ճապկուտ» կոչվող հանդամասում բռնկված հրդեհը

Տավուշի մարզի «Ճապկուտ» կոչվող հանդամասում  հունվարի 3-ին բռնկված հրդեհը մեկուսացվել է հունվարի 5-ի ժամը 14:30-ին, մարվել՝ 16:27-ին: Այրվել են մոտ 7 հա անտառամիջյան չոր տերևներ, մոտ 20 կանգուն չորացած ծառ (հաճարենի, բոխի, եղևնի), ծառերի կոճղեր և ջերմահարվել՝ մոտ 50 ծառ: Այս մասին տեղեկանում ենք ՀՀ ԱԻՆ-ից:

Ըստ աղբյուրի՝ հունվարի 3-ին, ժամը 10։42-ին Տավուշի մարզային ճգնաժամային կառավարման կենտրոնն ահազանգ է ստացել, որ Իջևան-Դիլիջան ավտոճանապարհի մոտ 7-րդ կմ-ին հարակից անտառի «Ճապկուտ» կոչվող հանդամասում կան ծխացող օջախներ:

Դեպքի վայր է մեկնել ԱԻՆ փրկարար ծառայության մարզային փրկարարական վարչության օպերատիվ խումբը:

Հրդեհաշիջման աշխատանքներին մասնակցել են «Հայանտառ» ՊՈԱԿ-ի «Իջևանի անտառտնտե­սություն» մասնաճյուղի 10 աշխատակից և 15 փրկարարական ծառայող, կիրառվել՝ 1 անօդաչու թռչող սարք։

Մթության և բարդ ռելիեֆի պատճառով հրդեհաշիջման աշխատանքները ժամանակավորապես դադարեցվել են․ մոտ 4 հա անտառամիջյան տարածքում այրվել են չորացած տերևներ, կոճղեր և խոտածածկույթ:

Հրշեջ-փրկարարների և «Հայանտառ» ՊՈԱԿ-ի «Իջևանի անտառտնտեսություն» մասնաճյուղի աշխատակիցների կողմից սահմանվել է հերթապահություն:

Հունվարի 4-ին, ժամը 07։40-ին հրդեհաշիջման աշխատանքները վերսկսելու նպատակով դեպքի վայր է մեկնել մարզային փրկարարական վարչության օպերատիվ խումբը։

Հրդեհաշիջման աշխատանքներին մասնակցել է 32 փրկարարական ծառայող, կիրառվել՝ 1 անօդաչու թռչող սարք։

Մթության և բարդ ռելիեֆի պատճառով հրդեհաշիջման աշխատանքները ժամանակավորապես դադարեցվել են: Անտառամիջյան տարածքում այրվել են չորացած տերևներ, կոճղեր և խոտածածկույթ (մոտ 7 հա):

Հրշեջ-փրկարարների կողմից սահմանվել է հերթապահություն:

Հունվարի 5-ին, ժամը 08։45-ին «Ճապկուտ» կոչվող հանդամասի հրդեհաշիջման աշխատանքները վերսկսվել են:

Դեպքի վայր են մեկնել ԱԻՆ ՓԾ մարզային փրկարարական վարչության օպերատիվ խումբը և հրշեջ-փրկարարական ջոկատից մեկ մարտական հաշվարկ: