Ստի և մանիպուլյացիաների վրա «բռնված» պաշտոնյաների թոփ 10-յակը

Թավշյա հեղափոխությունից հետո հանրության մոտ փորձ էր արվում ստեղծել այնպիսի տպավորություն, որ ի տարբերություն նախորդ իշխանությունների՝ հեղափոխական պաշտոնյաները բաց, թափանցիկ և ինչն էլ ավելի կարևոր է՝ անկեղծ են լինելու հանրության հետ: Սակայն, հինգ տարի անց կարող ենք փաստել, որ այս մի խոստումն էլ գրվել է սառույցին, ըստ այդմ ունենք պաշտոնյաներ, ում արված պնդումները և հայտարարությունները կարճ ժամանակ անց հերքվել են, այսինքն՝ դրանք հանրային կարծիքի պարզ և պրիմիտիվ մանիպուլյացիաներ էին:

Դիցուք՝ Փաշինյանի գլխավորած կուսակցության ՔՊ-ի նախընտրական ծրագրի արտաքին քաղաքականության բաժնում նշված են, որ կուսակցության ուղենիշն են ինչպես ՀՀ և Արցախի ժողովրդի, այնպես էլ սփյուռքահայության իրավունքների, անվտանգության և շահերի ապահովումը։ ՔՊ-ն պնդում էր, որ իր արտաքին և անվտանգային քաղաքականության գլխավոր առաջնահերթություններից են լինելու Ղարաբաղյան հակամարտության խաղաղ և համապարփակ կարգավորումը՝ արցախահայության ինքնորշման իրավունքի իրացման միջոցով, Արցախի ժողովրդի անվտանգության ապահովումը, ինչպես նաև մշակութային և կրոնական ժառանգության պահպանումն ու հումանիտար խնդիրների լուծումը։ Հատկանշական է, որ Նիկոլ Փաշինյանը հերթական անգամ ստել է ՀՀ հպարտ քաղաքացիներին։ Մասնավորապես, ընտրություններից հետո ՔՊ-ի նախընտրական ծրագրում խմբագրվել է Արցախյան հակամարտությանը վերաբերող բաժինը, որն այժմ հետևյալ բովանդակությունն ունի. «Կուսակցությունը որդեգրում է ԼՂ հիմնախնդրի կարգավորման նոր տեսլական»: Ըստ այդմ, եթե նախկինում առաջնահերթություն էր դիտարկվում ԼՂ կարգավիճակը, որը պիտի դառնա արցախահայության իրավունքների և անվտանգության երաշխիքը, այժմ առաջնահերթություն են դիտվում արցախահայության անվտանգությունն ու իրավունքները, և դրանց երաշխիքների համակարգից է բխեցվում անհրաժեշտ կարգավիճակը: 

Ըստ ընդդիմադիր քաղաքական ուժերի ներկայացուցիչների՝ ԱԽ քարտուղար Արմեն Գրիգորյանը ստել է՝ խոսելով ՀԱՊԿ-ի աջակցության փաթեթի դրույթների մասին։ Նրանք պնդում են, որ ՀԱՊԿ օգնության փաթեթը հստակ պարունակում էր նաև սպառազինության աջակցություն, դրա մասին վկայում են և բաց աղբյուրները, և իրենց ունեցած տեղեկատվությունները:

Առողջապահության նախարար Անահիտ Ավանեսյանը ներողություն էր խնդրել Արցախում զոհված տղաների հարազատներից՝ Աբովյանի դիահերձարանում նրանց որդիների աճյունների «ոչ պատշաճ պահման փաստի հետ կապված»: Նախարարը դա արել է իր ֆեյսբուքյան էջով: Մինչդեռ դրա նախորդող օրը նախարարը հայտարարում էր, որ պահման պայմանները համապատասխանում են նորմերին:

Պատգամավոր Բաբկեն Թունյանը օրեր առաջ ԱԺ նստաշրջանի ընթացքում հրապարակել էր տվյալներ, որ 2021-ին 3.2 տրիլիոն դրամի խաղադրույք է կատարվել Հայաստանում։ Մինչդեռ, վիճակագրական ծառայության հրապարակած պաշտոնական տվյալների համաձայն՝ շահումով խաղերի և այդ ոլորտի ամբողջ շրջանառությունը 2021-ի ինն ամիսներին կազմել է մոտ 200 մլրդ դրամ, այսինքն՝ 16 անգամ քիչ, քան պատգամավորն է նշել: 

 «Ազատություն» ռադիոկայանին տված հարցազրույցում ՀՀ էկոնոմիկայի նախարար Վահան Քերոբյանը հայտարարեց, թե հինգ տարում ՀՀ-ում քաղաքացիների եկամուտներն ավելացել են 60-70 տոկոսով։ Մինչդեռ, 2017 թվականի հոկտեմբերին Հայաստանում միջին ամսական աշխատավարձը կազմել էր 188,500 դրամ. նախորդ տարվա՝ 2021-ի հոկտեմբերին այս ցուցանիշը կազմել էր մոտ 200 հազար դրամ, իսկ արդեն այս տարվա նախնական տվյալներով՝ 236,900 դրամ, այսինքն՝ վերջին 5 տարում Հայաստանում միջին ամսական աշխատավարձն աճել է 48.400 դրամով կամ 25.7 տոկոսով։ Վերջին 5 տարիների ընթացքում միջին ամսական աշխատավարձն աճել է 25.7 տոկոսով, իրական գնաճը կազմել է 25.5 տոկոս, այլ կերպ ասած՝ մարդկանց զուտ եկամուտներն ավելացել են ընդամենը 0.25 տոկոսով։

 Հայաստանի առաջին արբանյակը Երկիր մոլորակի ուղեծիր դուրս բերվեց 2022-ի մայիսի 25-ին։ Շուտով պարզ դարձավ, որ արբանյակի շահագործման համար անհրաժեշտ է Հայաստանում արբանյակի կառավարման կենտրոն ստեղծել. այդ մասին հայտնեց վարչապետ Նիկոլ Փաշինյանը արբանյակի արձակման հաջորդ օրը եւ կենտրոնի կառուցման վերջնաժամկետ նշեց 2023թ.-ի վերջը։ Այնուհետեւ Բարձր տեխնոլոգիական արդյունաբերության փոխնախարար Ավետ Պողոսյանը հոկտեմբերի 25-ի Ազգային ժողովի նիստում, պատասխանելով պատգամավորի՝ կառավարման կենտրոնի ստեծման մասին հարցին, վստահեցրեց, որ այն պատրաստ կլինի մինչեւ 2022-ի տարեվերջ։ Մեկ ամիս անց՝ նոյեմբերի 18-ին, արդեն ԲՏԱ նախարար Ռոբերտ Խաչատրյանը հայտնեց, որ արբանյակի թեստավորումներն ավարտվել են, այն պատրաստ է շահագործման, իսկ կառավարման կենտրոնը շուտով կբացվի: Մինչեւ տարեվերջ նման կենտրոն այդպես էլ չբացվեց: 

2022-ի տարեվերջին կառավարության նիստերից մեկում վարչապետ Նիկոլ Փաշինյանը, անդրադառնալով ճանապարհների՝ խոստացված տարեկան 500 կմ վերանորոգմանը, նախարար Գնել Սանոսյանից հետաքրքրվեց՝ արդյոք կատարվել կամ կատարվում է տրված խոստումը, ինչին ի պատասխան` տարածքային կառավարման եւ ենթակառուցվածքների նախարարը հայտարարեց, որ ոչ միայն կատարել են խոստումը, այլ նաեւ գերակատարել են 20 կմ-ով: Ընդհանուր առմամբ, 2022-ին Հայաստանում նորոգվել է 486 կմ ավտոճանապարհ։ Այսպիսով, փաստենք, որ վերջին 3 տարիներին կառավարության կողմից խոստացված տարեկան 500 կմ ճանապարհների կառուցման եւ վերանորոգման խոստումները ոչ մի անգամ իրականություն չեն դարձել, իսկ նախորդ տարիներին հիմնանորոգված ճանապարհների մի մասը 2022-ին կրկին ներկայացվել են որպես հիմնանորոգված։

2020 թվականի փետրվարի 27-ին այն ժամանակ դեռ առողջապահության նախարարի պաշտոնը զբաղեցնող Արսեն Թորոսյանը հայտարարեց, թե կորոնավիրուսը վտանգավոր վարակ չէ, եւ սա այն դեպքում, երբ արդեն այդ ժամանակ այդ հիվանդությունն աշխարհում խլել էր 2700-ից ավելի մարդու կյանք:

Ադրբեջանական զինուժի կողմից փակված Կապան-Գորիս միջպետական ճանապարհը, «Քաղաքացիական պայմանագիր» խմբակցության պատգամավոր Նարեկ Ղահրամանյանի տեղեկություններով, մինչև երեկո պետք է բացվեր: Նման պնդում պատգամավորը արել է հենց ճանապարհի փակվելու առաջին իսկ օրը, ճանապարհը փակ է մինչ այս պահը:

«Հայաստանը Ադրբեջանի հետ Լաչինի միջանցքում անցակետ տեղադրելու վերաբերյալ բանակցություններ չի վարում, միջանցքի եւ դրա ռեժիմի շուրջ բանակցությունները վաղուց ավարտված են». սրանք ՀՀ արտաքին գործերի նախարար Արարատ Միրզոյանի խոսքերն են՝ ասված այս տարվա մարտի 22-ին խորհրդարանում։ Նրա հայտարարությունից ամիսներ անց ունենք մի իրավիճակ, երբ անցակետը տեղադրված է, եւ այդ պատճառով էլ ադրբեջանական կեղծ բնապահպանները դադարեցրել են ակցիան։