Ընդդիմադիր ուժերի կոնսոլիդացիայի գործընթացը կարող է խառնել Երևանում ՔՊ բոլոր «խաղաքարտերը»

Արդեն իսկ հայտնի է, որ սեպտեմբերի 17-ին նշանակված ընտրություններին մասնակցելու համար ԿԸՀ հայտ են ներկայացրել 13 կուսակցություն եւ մեկ դաշինք: Նախընտրական քարոզարշավը մեկնարկելու է օգոստոսի 23-ին, տեւելու է մինչեւ սեպտեմբերի 15-ը։ Քվեարկությունը կկայանա սեպտեմբերի 17-ին, 16-ը լռության օր է։

Վերջին 20 տարվա ընթացքում առաջին անգամ քաղաքապետի ընտրություններին չի մասնակցում խորհրդարանական ընդդիմությունը։ Ազգային ժողովի «Հայաստան» և «Պատիվ ունեմ» խմբակցությունների հիմնական ուժերը՝ Դաշնակցությունն ու Հանրապետականը, տևական լռությունից հետո օրերս հաստատեցին, որ չեն մասնակցի։ Սերժ Սարգսյանի ղեկավարած ՀՀԿ-ն իր անդամներին կոչ արեց սատարել բացառապես իրական ընդդիմադիր հայացքներով ազգային ուժերին, Դաշնակցությունը չհստակեցրեց, թե ում է սատարելու, միայն նշեցին, թե առաջադրումներից և գրանցված թեկնածուների ծրագրերի հրապարակումից հետո հանդես կգան հավելյալ հայտարարությամբ։ 

Փոխարենը այս ընտրություններին ասպարեզ են եկել մի շարք նոր ուժեր, մասնավորապես՝ Վարդան Ղուկասյանի ղեկավարած «Հանրային ձայնը», որը ըստ Երևանում անցկացրած վերջին հարցումների արդյունքում առաջատարների ցանկում է և այս ուժից բազմաթիվ անակնկալներ պետք է ակնկալել, Երվանդ Թարվերդյանի ղեկավարած «Միացյալ Հայաստան» կուսակցությունը,  Կենտրոնի նախկին թաղապետ Վիկտոր Մնացականյանի «Հաղթանակը», Անդրանիկ Թևանյանի գլխավորած «Մայր Հայաստանը»:

Մասնակցում են նաև հանրությանը բավական ծանոթ քաղաքական ուժեր՝ «Ապրելու Երկիր» կուսակցությունը, «Լուսավոր Հայաստան»-ը, «Հայաստանի Եվրոպական» կուսակցությունը, «Հանրապետություն»-ը, «Արդար Հայաստան» կուսակցությունը, ՀԱՍԿ-ը:  Այս ուժերի ներկայացուցիչները խուսափում են խոսել իշխանափոխության մասին, բայց մերթ ընդ մերթ քննադատում են իշխանություններին։ Նրանցից մի քանիսն էլ պարբերաբար մասնակցում են Նիկոլ Փաշինյանի՝ արտախորհրդարանական ուժերի հետ կազմակերպած հանդիպում-քննարկումներին:

Նախընտրական ցուցակներում կան նաև այսպես կոչված «ճամբարափոխներ»: Դիցուք՝ ԱԺ նախկին պատգամավոր Գոռ Գևորգյանը Երևան քաղաքի ավագանու ընտրություններին կմասնակցի «Ապրելու երկիր» կուսակցության թիմի կազմում։ 

Թեև ընտրություններին մասնակցելու հայտ ներկայացրած ուժերի թիվը անցնում է մեկ տասնյակը, կարելի է ենթադրել, որ հիմնական պայքարը ընթանալու է իշխող ՔՊ նախընտրական ցանկը գլխավորող Տիգրան Ավինյանի և Ազգային առաջընթաց կուսակցության ցանկով առաջադրված Երևանի նախկին քաղաքապետ Հայկ Մարությանի միջև: Վերջինս 130 հոգանոց ցուցակ է ներկայացրել, որտեղ ընդգրկված են հիմնականում իր հետ աշխատած մարդիկ՝ կառավարման մասնագետներ:  Իր հերթին ՔՊ-ն դեռևս 30 հոգանոց ցուցակ է ներկայացրել: Տիգրան Ավինյանին հաջորդում է Արմեն Փամբուխչյանը. վերջինս Նիկոլ Փաշինյանի որոշմամբ նաև ղեկավարում է ՔՊ-ի նախընտրական շտաբը, քանի որ համարվում է վարչապետի վստահելի անձանցից մեկը: ՔՊ ավագանու ցուցակի երրորդ համարը Նուարդ Վարդանյանն է․ նա ԱԺ ՔՊ խմբակցության պատգաավոր՝ «ականջ ծամող» Ծովինար Վարդանյանի քույրն է:

Այն, որ մրցապայքարի ֆավորտիները հենց այս երկու թեկնածուներն են փաստել է նաև «Գելլափ ինթերնեյշնլ» ասոցիացիայի կողմից իրականացված վերջին հարցումը, որի համաձայն հարցվածների 9,3 տոկոսը նշել է, որ ընտրելու է «Քաղաքացիական պայմանագրի» թեկնածու Տիգրան Ավինյանին, 3,7 տոկոսը նշել է՝ Հայկ Մարությանին: Ընտրություններին մասնակցելու հայտ ներկայացրած մյուս ուժերի թեկնածուներից յուրաքանչուրը հավաքել են 2 տոկոսից պակաս ձայն:

Գաղտնիք չէ, որ չնայած իշխանությունների մեծ ցանկությանը ՝ ցույց տալու, որ իրենց թեկնածուն վայելում է երևանցիների ճնշող մեծամասնության աջակցությունը, իրավիճակը տրամագծորեն հակառակն է: ՔՊ դիրքերը Երևանում անչափ թույլ են, էլ ավելի այդ դիրքերը թուլացան համապետական ընտրություններից հետո, պայմանավորված երկրի շուրջ ձևավորված ներքին և արտաքին քաղաքական, տնտեսական և անվտանգային մարտահրավերներով և այդ մարտահրավերներին իշխանությունների ոչ ադեկվատ արձագանքով:

Այստեղ մի պարզ ենթադրություն կարելի է անել առ այն, որ եթե սեպտեմբերին կայանալիք ավագանու ընտրությունների ժամանակ ընդդիմադիր թեկնածուներից որևէ մեկին հաջողվի հավաքել ընտրողների ձայների 25-30 տոկոսը, ապա ողջ ընդդիմադիր դաշտը պետք է օգտագործի ընձեռված ռեալ հնարավորությունը, համախմբվի այդ թեկնածուի շուրջ՝ թույլ չտալու ՔՊ թեկնածուի հաղթանակը և իշխանությունների վերարտադրությունը Երևանում: Ինչպես և վերը նշել էինք՝ նմանատիպ արդյունք գրանցելու ամենամեծ շանսերը այս պահի դրությամբ ունի հենց Հայկ Մարությանը: Կարելի է ասել, որ արդեն իսկ ուրվագծվում է նման սցենարի իրականացման հնարավորությունը, իսկ թե ինչպիսին կլինի քաղաքական կոնֆիգուրացիան ընտրություններից հետո, արդյոք՞ ընդդիմադիր կուսակցությունները մի կողմ կդնեն հատվածային շահերը և իսկապես կմիավորվեն՝ թեկուզ և Երևանի մակարդակում իշխանափոխություն իրականացնելու գաղափարի շուրջ՝ ցույց կտա ժամանակը:

Այս թեմայով Ծեծկռտուք՝ Երևանում հայտնի «Արամե մյուզիք հոլ» ակումբում․ Կան բերման ենթարկվածներ Հայտնաբերվել է Երևանում տիկտոկերի «Honda»-ն, դրա մոտ կայանված «BMW X6»-ը, «Opel»-ը հրկիզողը. պարզվել է նաև պատվիրատուն ՆԳՆ ոստիկանությունը պարզաբանել է՝ ինչու էր Երևանում կաթվածահար եղել երթևեկությունը Երևանում ընդամենը օրերս արված ասֆալտը դարձյալ քանդել-ասֆալտում են Արտակարգ դեպք՝ Երևանում. Օղիով բարձված բեռնատարը հայտնվել է արգելապատնեշների վրա