ՔՊ-ական պաշտոնյաները «պատերազմ» են հայտարարել փոքր ու միջին բիզնեսին

Չնայած այն բոլոր խոստումներին և հավաստիացումներին, որ հեղափոխությունից հետո շարքային հպարտ քաղաքացիների կյանքը կբարելավվի՝ վերջին չորս տարիները գալիս են ապացուցելու հակառակը: Ի տարբերություն ՔՊ-ական պաշտոնյաների, որոնց սոցիալական վիճակի բարվոքությունը որևէ կասկած չի հարուցում, վերջիններիս կողմից ընդունված բազմաթիվ որոշումներ ուղղակիորեն հարվածել և հարվածում են քաղաքացիների գրպանին՝ էլ ավելի բարդացնելով նրանց առանց այդ էլ ծանր ֆինանսական դրությունը: Բացի շարքային քաղաքացիների գրպաններից, այդ հարվածներից զերծ չի մնում նաև փոքր ու միջին բիզնեսը:

Դիցուք՝  պատգամավոր Գեւորգ Պապոյանի առաջարկած աղմկահարույց նախագիծը, որով առաջարկում է օրենքը փոխել, որ կառուցապատողներին բանկը հիպոթեքային պայմանագրերի գումարները տրամադրի ոչ թե կառուցապատման սկզբում, այլ՝ վերջում, երբ բնակարանները հանձնվեն շահառուներին, բունտ է հասունացրել կառուցապատողների մոտ։ Բանն այն է, որ դրանով լուրջ հարված է հասցվելու փոքր ու միջին կառուցապատողներին:

Էլեկտրոնային առողջապահության համակարգին չմիանալը նույն ԱԺ թեթե ձեռամբ այսուհետ առաջացնում է տուգանք` 30․000 – 50․000 դրամի չափով: Պարտադիր վարման ենթակա բժշկական (այդ թվում` էլեկտրոնային) փաստաթղթեր չվարելն առաջացնում է տուգանք` 50․000 – 60․000 դրամի չափով: Իսկ նույն արարքը կրկին կատարելը վարչական տույժի միջոց կիրառելուց հետո` մեկ տարվա ընթացքում, առաջացնում է տուգանք` 70․000 – 100․000 դրամի չափով:

ԱԺ թեթե ձեռամբ թանկացավ նաև գույքահարկը` դոմինոյի էֆֆեկտով թանկացումներ առաջացնելով նաև մյուս ոլորտներում: Նախագծի հեղինակները «Իմ քայլը» խմբակցության պատգամավորներ Գևորգ Պապոյանն ու Արգիշտի Մեխակյանն էին:

Էկոնոմիկայի նախարար Վահան Քերոբյանի անգործության և ընդունած որոշման արդյունքում գյուղատնտեսությամբ զբաղվողների համար պարարտանյութը և թունաքիմիկատները կտրուկ թանկացել են` հասնելով ընդհուպ 20 հազար դրամի:

ՄՊՊՀ նախագահ Գեղամ Գևորգյանը օրեր առաջ հայտարարել էր, որ ուսումնասիրություն է ընթանում կապված պարարտանյութերի գների կտրուկ թանկացման հետ: Դրանից հետո որևէ դրական մեսիջ գյուղացիները այս կառույցից այդպես էլ չստացան, Գևորգյանի ղեկավարած կառույցից հայտնեցին, որ պարարտանյութ ներկրող և սպառող օլիգարխները ստեղծված իրավիճակում որևէ մեղք չունեն, մեղավորը դրսի շուկան է, որտեղ գները կտրուկ թանկացել են, գյուղացին էլ եղունգ ունի՝ պետք է գլուխը քորի:

Այլևս չի գործում ընտանեկան բիզնեսի համար 2017-ից եղած արտոնությունը, որի համաձայն՝ ընտանիքի անդամներով աշխատելու դեպքում յուրաքանչյուր անձի համար հարկի փոխարեն ընդամենը 5000 դրամ էր վճարվում։ Հարկային օրենսդրության փոփոխությունը յուրաքանչյուր աշխատողի համար պարտավորեցնում է վճարել, առնվազն, նվազագույն աշխատավարձ և 20% եկամտային հարկ: Փոփոխությունների հեղինակը ֆինանսների նախարարությունն է:

«Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի նախագիծը, որի զեկուցողը ԱԺ-ում ԱՆ փոխնախարար Լենա Նանուշյանն էր, նույնպես հիմնականում հարվածել և հարվածելու է փոքր ու միջին տնտեսվարողներին: