Ում հաշվին է ծաղկում Նիկոլ Փաշինյանի ընտանեկան հիմնադրամը

Թափանցիկության ջատագով Նիկոլ Փաշինյանի կնոջ՝ Աննա Հակոբյանի «Ժպիտների քաղաք» հիմնադրամը ներկայացրել է նախորդ տարվա ընթացքում ստացված նվիրատվությունների ցանկը: Ուշագրավ է, որ այդ ցանկում են հայտնվել ընկերություններ, որոնք այս կամ այն պատճառներով հայտնվել էին մի շարք պետական կառույցների ուշադրության կենտրոնում, կամ արտոնություններ էին ստացել կառավարությունից։

Դիցուք՝ «Նիկիտա Մոբայլ» ՍՊԸ-ն։ Ուշագրավ է, որ նույն թվականին այս ընկերությունը շահել է ՀՀ ոստիկանության կարիքների համար կարճ հաղորդագրություններ /sms/ ծառայությունների ձեռքբերման մրցույթը։

Նվիրատուների ցանկում է նաև «Ֆինլեքս» ՍՊԸ-ն: ՀՀ ՊԵԿ համալիր հարկային ստուգումների վարչության ստուգումների թիվ 4 բաժնի գլխավոր հարկային տեսուչ Հակոբ Լուլուկյանի ընտանիքի անդամներից մեկն աշխատում է այս ընկերությունում։

Ահա վարչապետի ընտանեկան հիմնադրամի մյուս նվիրատուները.

Նաիրե Իգիթյանը հիմնադրամին փոխանցել է 100 000 դրամ: Համացանցում որոնելիս նման անուն ազգանունով ընդամենը մեկ մարդ ենք գտնում, այն է՝ Օշականի բժշկական ամբուլատորիայի աշխատակից Նաիրե Իգիթյանը։

«Յունիքորն Թրեյդ» ՓԲԸ-ն Փաշինյանի ընտանեկան հիմնադրամին է փոխանցել 1 000 000 դրամ: Մամուլում այս ընկերությունը կապվում է Գուրգեն Արսենյանի անվան հետ:

«Գյումրի-Գարեջուր» ՍՊԸ-ն 250 000 դրամ է փոխանցել, ինչպես գիտենք՝ այն պատկանում է Գյումրիի նախկին քաղաքապետ Սամվել Բալասանյանի ընտանիքին: Հիշեցնենք, որ վերջինս հանդեպ քրեական գործ է հարուցված:

Նվիրատուների ցուցակում հայնդիպում ենք Վահագն Թևոսյանի անուն-ազգանունը, նա ընդամենը 1000 դրամ է նվիրաբերել հիմնադրամին։ Թևոսյանը, հիշեցնենք, նախկինում «Իմ քայլը» խմբակցության պատգամավոր էր, այժմ Հանրային հեռարձակողի խորհրդի անդամ է։

Նվիրատուներից մյուսը, որը 5000 դրամ է փոխանցել, և ենթադրվում է, որ փոխանցումը կատարել է Հայաստանից, Կլառա Ջանգիրյանն է։ Այդպիսի անուն-ազգանունով քաղաքացի Հայաստանում չկա, փոխարենը՝ կա Կլարա Ջհանգիրյան անուն-ազգանունով անձ, ով ԲԴԽ նախագահի նախկին ԺՊ Գագիկ Ջհանգիրյանի դուստրն է:

«ՀԱՅԲԻԶՆԵՍԲԱՆԿ» ՓԲԸ-ն փոխանցել է 2 000 000  դրամ: Ըստ «Հայբիզնեսբանկ»-ի հաշվետվության՝ նախորդ տարվա դեկտեմբերի 28-ին բանկի միակ բաժնետեր է դարձել «էմ էֆ էմ գլոբալ ինվեստ» ընկերությունը, որը գրանցված է Շվեյցարիայում՝ Ցյուրիխում։ Հունվարին բանկում բաժնետերերի նոր փոփոխութուն է տեղի ունենում ու «Էմ էֆ էմ գլոբալ ինվեստ»-ի (MFM Global invest AG) բաժնետոմսերի 25 տոկոսն անցնում է «Բնակարան երիտասարդներին» վերաֆինանսավորում իրականացնող վարկային կազմակերպությանը։ Սա, ըստ էության, նշանակում է, որ «Հայբիզնեսբանկ»-ի բաժնետեր է դարձել Հայաստանի Կենտրոնական բանկը, քանի որ «Բնակարան երիտասարդներին» վարկային կազմակերպության հիմնադիրն ու բաժնետերը ԿԲ-ն է։ Այս գործարքներից հետո նախկին փոխվարչապետ Տիգրան Ավինյանը դարձել է բանկի տնօրենների խորհրդի անդամ։

Մոհամադ Մաքքին Փաշինյանի ընտանեկան հիմնադրամին է փոխանցել 50 000 ԱՄՆ դոլար:

Լերման Մեսրոպյան անուն ազգանունով անձը հիմնադրամին է փոխանցել 5000 ԱՄՆ դոլար:

«ՍԵՊՈՒՀ ԱՐՔԵՊԻՍԿՈՊՈՍ ՉՈՒԼՋՅԱՆԻ ԱՆՎԱՆ» ԲՀ-ն փոխանցել է 4 000 000 դրամ:

Արմեն Կարապետյան անունով քաղաքացին փոխանցել է 850 $:

Ինչ վերաբերում է խոշոր չափի փոխանցումներին, ապա 200 հազար դրամից մինչև 37 մլն դրամ բոլոր փոխանցումները կատարվել են անանուն։ 

«Ախթալայի լեռնահարստացման կոմբինատ» ՓԲԸ-ն 10 000 000 դրամ է նվիրաբերել Փաշինյանի ընտանեկան հիմնադրամին:

«ԱՆ-ՆԱՐ» ՍՊԸ-ի նվիրաբերած գումարը նույնպես կազմում է 10 000 000 դրամ: 2015-ին ՀԵՏՔ պարբերականը հոդված էր հրապարակել, որում նշվում էր, որ տվյալ ՍՊԸ-ն պատկանում է Կոտայքի մարզպետարանի քաղաքաշինության վարչության պետ Արշավիր Խաչատրյանին

Ղևոնդ Էմյանը նվիրաբերել է 5 000 000 դրամ: Նման անուն ազգանունով անձի փնտրտուքը համացանցում որևէ բան չտվեց, գտնվեց միայն մեկ ԱՁ, որը զբաղվում է հրավառության միջոցառումների կազմակերպմամբ:

Եթե 2018-ին հանգանակվել էր ավելի քան 270 միլիոն դրամ, 2019-ին՝ 756 միլիոն դրամ, 2020-ին՝ 421 միլիոն դրամ, 2021-ին՝ 1, 9 միլիոն դրամ, իսկ 2022-ին 11 ամիսների ընթացքում՝ 126001 դրամ: Կտրուկ նվազել են նաև նվիրատվությունները սփյուռքից և դա հասկանալի է․ հատկապես պատերազմից հետո սփյուռքի վստահությունը ՀՀ իշխանությունների հանդեպ կտրուկ նվազել է։