Ուր են և ինչու են լռում Հայաստանի խոշոր գործարարներն ու պաշտոնյաները. Արթուր Ջավադյան

ԼՈւՐԵՐ.com-ը շարունակում է անդրադառնալ այն պաշտոնյաներին և գործարարներին, ովքեր երկար տարի զբաղեցրել են պետական կարևորագույն պաշտոններ, հարստություն և բիզնես են դիզել՝ Հայաստանի և Արցախի անունը հոլովելով, իսկ այսօր, երբ Արցախում տեղի է ունենում անթաքույց ցեղասպանություն, լռում են և նախընտրում են մնալ ստվերում:

Այսօր կանդրադառնանք տասնյակ տարիներ ԿԲ նախագահի պաշտոնը զբաղեցրած Արթուր Ջավադյանին: Ջավադյանի ողջ կարիերան կառուցվել է պետական կառավարման համակարգում բարձր պաշտոններ զբաղեցնելով:  2000-2001 թթ. նա եղել է ՀՀ կենտրոնական բանկի նախագահի խորհրդական, 2001-2003 թթ.՝ ՀՀ կենտրոնական բանկի Խորհրդի անդամ, 01.09.2003 թ.-20.10.2003 թ.՝ ՀՀ կենտրոնական բանկի նախագահի խորհրդական, 2003-2008 թթ.՝ ՀՀ կենտրոնական բանկի նախագահի տեղակալ։ 2008 թ. մայիսի 30-ին ՀՀ վարչապետի որոշմամբ նշանակվել է Արժույթի միջազգային հիմնադրամի կառավարիչների խորհրդում Հայաստանի կառավարչին փոխարինող անձ (փոխկառավարիչ)։ 2008 թ. մայիսի 31-ին ՀՀ վարչապետի որոշմամբ նշանակվել է Սևծովյան տնտեսական համագործակցության կազմակերպության բանկի կառավարիչների խորհրդում Հայաստանի կառավարիչ։ 2008 թ. հունիսի 11-ին ՀՀ Ազգային ժողովի որոշմամբ նշանակվել է ՀՀ կենտրոնական բանկի նախագահ։ 2014 թ. մայիսի 20-ին ՀՀ Ազգային ժողովի որոշմամբ 2014 թ. հունիսի 12-ից վերանշանակվել է ՀՀ կենտրոնական բանկի նախագահի պաշտոնում։ 2008-2020 թթ.՝ Հատուկ հանձնարարություններով դեսպան, ՀՀ կենտրոնական բանկ, նախագահ։ 2021 թ. հուլիսի 15-ից՝ Տնօրենների հայկական ինստիտուտի Խորհրդի նախագահ։ 2022 թ․ հունիսից՝ «ԱյԴի Բանկ» ՓԲԸ Խորհրդի անդամ :

Ջավադյանը պարգևատրվել է Անանիա Շիրակացու մեդալով, «Հայրենիքին մատուցած ծառայությունների համար» 2-րդ աստիճանի մեդալով, Վաչագան Բարեպաշտ, Մեսրոպ Մաշտոց շքանշաններով:

Ջավադյանը պատկանում է այն բարձրաստիճան պաշտոնյաների թվին, ովքեր հաճախ էին այցելում Արցախ: Նա երկու հանրապետությունների բանկային համակարգերի միջև համագործակցության վառ ջատագովներից մեկն է եղել: Նրա մասնակցությամբ կյանքի են կոչվել մի շարք ծրագրեր, մասնավորապես, Արցախի իշխանությունների կողմից ներկայացվել են բնակարանաշինության ծրագրերը: Ինքը՝ Ջավադյանն էլ մշտապես ամեն այցից հետո վստահություն էր հայտնում, որ Արցախում տնտեսական ցուցանիշները գնալով միայն աճելու են:

Իսկ ուր է այսօր և ինչու է լռում Արթուր Ջավադյանը․ մարդ, ով փաստացի կայացել է և ավելորդ չի լինի նշել՝ բավական մեծ ունեցվածք է դիզել Հայաստանի պետական կառավարման համակարգում՝ տարիներ շարունակ յուղոտ պաշտոններ զբաղեցնելով: Հեղափոխությունից հետո Ջավադյանը ոչ միայն մնաց իր պաշտոնում, այլ մի բան էլ ԿԲ-ին հրաժեշտ տալուց հետո հարմար տեղավորվեց Նիկոլ Փաշինյանի ձեռքի տակ՝ դառնալով վերջինիս հատուկ հանձնարարություններով դեսպանը: Ջավադյանը որպես նախկին և ներկա բարձրաստիճան պաշտոնյա ոչինչ չունի՞ ասելու հայաթափված Արցախի և Հայաստանին սպառնացող վերահաս վտանգների մասով, թե, ինչպես ասում են, պաշտոնը քացր բան է, պաշտոնից կտրվելն էլ՝ բավական ցավոտ...

Շարունակելի..